Rreth 600 manifestime u zhvilluan në Shtetet e Bashkuara brenda një dite, kundër politikës së Presidentit Trump për ndarjen e familjeve të emigrantëve të jashtëligjshëm.
Protesta pati nga Nju Jorku, me mbi 30 mijë manifestues që marshuan në urën e Bruklinit, në Uashington, Los Anxheles, Boston e qindra qytete të tjera.
Manifestuesit kërkuan shpërbërjen e Agjencisë Ligjzbatuese për Doganat dhe Migracionin, që zbatoi në terren urdhrin e Trump për ndarjen e fëmijëve nga prindërit e tyre emigrantë që kalojnë ilegalisht kufirin amerikan. Zërit të manifestuesve në Uashington iu bashkuan edhe figura si këngëtarja Alicia Keys dhe aktorja America Ferrera.
Duke akuzuar Presidentin Trump si fashist, manifestuesit zgjodhën si simbol të manifestimeve grushtin lart. Në reagimin e tij në Tëitter, Trump mbrojti agjencinë që është pjesë e Departamentit për Sigurinë dhe akuzoi protestuesit si radikalë të majtë brenda radhëve të demokratëve.
Urdhri i dhënë nga Trump në Prill dhe që qëndroi në fuqi për 2 muaj ndau mbi 2300 fëmijë nga prindërit e tyre emigrantë, duke u shkaktuar atyre trauma sociale.
a.ç
