Nuk gjejne paqe te afermit e kater demonstruesve te vrare para kryeministrise me 2i nga Garda e repoublikes, duke kerkuar qe te vrasesait dhe urdheruesit e tyre te shkojne para drejtesie menjehere.
Per kete familjarët e viktimave të 21 janarit vazhdojnë të kërkojnë drejtësi nga qeveria Rama. Madje nuk kanë ngurruar që t’i bëjnë thirrje organeve të drejtësisë që të rihapin edhe njëherë hetimet duke vënë para përgjegjësisë të gjithë shkaktarët kryesorë.
Fill pas akordimit të fondit të dëmshpërblimit nga qeveria për familjet e 4 të ndjerëve që humbën jetën në demonstratën e 21 janarit ka ardhur dhe reagimi i familjarëve. Ka qenë Mark Nika, xhaxhai i të ndjerit Aleks Nika, ai që gjatë një prononcimi për “sot” është shprehur se nuk kërkojnë dëmshpërblim nga ana e qeverisë, por vënien para përgjegjësisë së Berishës dhe organizatorëve të këtij të fundit që urdhëruan vrasjen e demonstruesve të 21 janarit.
Madje Nika deklaroi se ka qenë vetë ish-kryeministri Berisha ai që detyroi organet e drejtësisë që të mbyllin hetimet e 21 janarit. “Ne si familjarë jemi në një siklet të jashtëzakonshëm. Ne kemi kritikuar dhe kritikojmë mënyrën sesi interpretohet ky akt i Këshillit të Ministrave. Opinioni i ka vlerësuar si derdhje gjaku këto lekët apo blerje nga qeveria për mosrealizimin e premtimit për zbardhjen e vrasjeve të 21 janarit.
Ne tani e kuptojmë se qeveria aktuale ka detyrimin për të paguar faturën e fajit që ka kryer qeveria Berisha ndaj nesh në protestën e 21 janarit.
Pra shteti sot duhet të paguajë faturën e dhimbjes morale që na ka shkaktuar ne si familje qeveria e mëparshme. Ne duam që vrasësit dhe urdhëruesit e 21 janarit të shkojnë para drejtësisë. Se përse është vonuar kjo gjë dhe se pse nuk është vepruar, dihet botërisht.
Drejtësia është treguar e padrejtë me ne jo sepse është e përgatitur profesionalisht por se ka pasur ndikime nga politika e Berishës. Berisha e ka deklaruar që: “I vramë dhe do t’i vrasim sërisht nëse do të tentoni për të marrë pushtetin me dhunë”.
Dëmshpërblimi në këto kushte është i qëllimshëm, pasi është jashtë dijenisë tonë. Sepse nuk vendoset drejtësia duke na dhënë lekë neve”, u shpreh Mark Nika, xhaxhai i të ndjerit Aleks Nika.
Sakaq Mark Nika, duke u ndalur dhe tek reforma në drejtësi, nuk nguroi që të drejtonte thirrje dhe për institucionet e reja që do të marrin jetë që të hapin edhe njëherë dosjen e 21 janarit.
“Prandaj ne kemi kërkuar që vrasësit e Aleksit por edhe të të ndjerëve që humbën jetën në 21 janar të vihen para drejtësisë. Kërkojmë me çdo kusht që çështja të hetohet dhe të rihetohet nga organet e drejtësisë të reja që do të formohen me reformën në drejtësi”, tha ai.
ma.me
