Nga Ardit Rada
Duket se në Shqipëri duhet të ndodhin ngjarje të skajshme për të pasur një bashkëpunim të politikës, ose së paku një “armëpushim”.
Ka qenë kryeministri Edi Rama ai që ka falenderuar kreun e PD-së për mirëkuptimin e djeshëm në Kuvend.
“Dua ta falenderoj Lulzim Bashën që dje ka shprehur mirëkuptimin për të ndërprerë diskutimet që ishin në rendin e ditës për buxhetin nga ana e opozitës dhe për të na dhënë mundësinë të mbyllim seancën në një kohë të arsyeshme që të ishim në krye të dëryrës” – tha sot Rama në Fier.
Mirëpo nga ana tjetër, edhe kreu i Partisë Demokratike Lulzim Basha ka kryer një inspektim në zonën e Kamzës. Në takimin e tij me bizneset dhe qytetarët, Basha u kërkoi atyre bashkëpunim me stafet e emergjencave civile për ta përballuar këtë situatë.
Në thelb, reagimet e dy figurave kryesore të politikës ngjajnë si një marrëveshje e heshtur. Kjo pasi u kalua nga një sherr i egër për buxhetin në Kuvend, në një mirëkuptim për gjendjen në vend. Por në fakt, kjo është gjëja me normale që duhet të ndodhë kur vendi goditet nga fatkeqësitë natyrore, katastrofa apo ngjarje aksidentale me pasoja të mëdha.
Situata të tilla në vend ndodhin rrallë. Kujtojmë këtu ato pak raste si lufta e Kosovës 1998-1999 dhe shpërthimi në Gërdec në vitin 2008. Apo edhe kapërcimi i “krizës së çadrës” ku palët i dhanë dorën njëra-tjetrës dhe arritën një marrëveshje politike të pa dëgjuar më parë. /JavaNews/
