“Faleminderit, ditën e mirë”. Me këto fjalë e ka mbyllur kreu i Kuvendit seancën e sotme ndërsa mazhoranca është larguar nga salla pas një ore punimesh mes bllokimit të foltores dhe replikave nga vendi.
Ndërkohë, kryeministri Edi Rama si rrallë herë nuk e ka marrë fjalën në seancë, kjo edhe për shkak se Lulzim Basha nuk ka lëvizur asnjë sekondë nga podiumi.
Herë me mikrofon në televizione, e herë në Facebook, Basha ka vijuar akuzat ndaj mazhorancës si të lidhur me trafikun e drogës. Ndërsa LSI është treguar e heshtur gjatë seancës së sotme, raporton JavaNews.
Pavarësisht votimit të ligjeve, Basha ka vijuar paralelisht fjalën e tij drejtuar ndjekësve në Facebook.
***
Pas dy pushimesh të kërkuara nga Gramoz Ruçi, foltorja e Parlamentit ka vijuar të jetë e bllokuar nga Lulzim Basha.
Ndërkohë në sallë ka mbërritur kryeministri Edi Rama, i cili nuk ka qenë i pranishëm që në fillimin e punimeve të së enjtes.
Duke i bërë apel Bashës, Ruçi tha se është zgjedhur që të drejtojë Kuvendon dhe jo rrjetet sociale ku transmeton opozita.
Pas refuzimit të kryedemokratit, Ruçi ka ndërprerë për herë të tretë për 10 minuta seancën.
***
Opozita ka zbatuar skenarin e bllokimit të Kuvendit fill pas fjalës së Sali Berishës dhe Lulzim Bashës.
Teksa ka përfunduar minutazhin e caktuar sipas rregullores, kreu demokrat nuk ka pranuar të lirojë foltoren. Ndërkohë që Gramoz Ruçi tha se skenari i opozitës për bllokimin e Kuvendit, do të sjellë shtyrjen e raportimeve nga institucionet e planifikuara në rendin e ditës.
Sot, kreu i Partisë Demokratike tha sot se kancelaritë evropiane janë të shqetësara për krimin në Shqipëri.
Në fjalën e tij për procedurë para Parlamentit, Basha tha se Edi Rama ka katër javë që i fshihet të vërtetës.
“Më këtë seancë mungojnë dy nga kokat kryesore të aleancës me krimin, Edi Rama dhe Fatmir Xhafaj. Kërkesa jonë është e kuptueshme dhe e qartë. Kjo seancë nuk duhet të vijojë pa praninë e këtyre të dyve. Nëse kanë vendosur të mos vijnë më në këtë sallë, le ta çojnë deri ne fund dhe ta çlirojnë Shqipërinë nga pengmarrja. Këtë shqetësim ia kanë thënë edhe ministres së Drejtësisë në Bundestangun gjerman gjatë vizitës së saj. Normalisht më kanë informuar edhe mua” – tha Basha në Kuvend.
Kreu i PD tha se ka vizituar Berlinin për të diskutuar shqetësimin e gjermanëve se situata politike 6 jave pasi Rama u largua nga Berlini, situata politike ka shkuar drejt përkeqësimit.
Ndërkohë, kreu i Kuvendit ka ndërprerë dy herë seancën ndërsa opozita ka vijuar transmetimin në rrjetin social Facebook.
/javanews/b.d
