Policia i ka referuar në Prokurori bashkë me provat e tjera “borderotë” e shumave të dhëna hua me fajde në momentin e arrestimit të Fadil Bamit me 5.1 kilogramë heroinë.
Burime zyrtare të Policisë kanë konfirmuar dje se bëhet fjalë për dy fletë, ku i arrestuari 64-vjeçar ka mbajtur shënim shuma të dhëna personave të ndryshëm, që duket se kanë qenë të njohur të tij.
Sipas dokumentit të sekuestruar nga Policia, pranë disa prej shumave, Fadil Bami ka shkruar vetëm emrin e personit, pa mbiemër, çka nënkupton njohjen personale me marrësin e parave.
Kështu, në letër shkruhet se në një rast i arrestuari me heroinë ka dhënë 150 mijë euro për tre muaj me interes 1200 euro në secilin muaj. Aty është shënuar se marrësi i borxhit, në fund të periudhës duhej t’i kthente të arrestuarit shumën e borxhit plus interesin.
Në një rast tjetër, sipas shënimeve në letër, Fadil Bami ka dhënë 25000 euro, duke përfituar nga 5 mijë euro në secilin muaj për periudhën tremujore të huadhënies. Në total, vlera e shënuar në dokumentin e sekuestruar të të arrestuarit është 461 000 euro.
Në shkresën tjetër ndodhen deklaratat e shkruara me dorë nga marrësit e parave që deklarojnë “me përgjegjësinë e tyre” se do të kthejnë shumat e parave që kanë marrë. Në fund të letrës ndodhen edhe firmat e personave që merrnin paratë dhe nënshkrimi i Fadil Bamit.
HETIMET PËR HEROINËN
Policia e Tiranës njoftoi dy ditë më parë kapjen e një sasie heroine prej 5.1 kilogramësh dhe arrestimin e dy personave.
Fadil Bami, 64 vjeç, lindur dhe banues në Nikel të Krujës, i afërm i Durim Bamit, ra në pranga bashkë me Eduart Gjatën, 39 vjeç, banues në Tiranë. Ata mendohet se kishin të paktën nga fillimi i këtij viti që sillnin sasi heroine në Tiranë dhe më pas ua shisnin grupeve të ndryshme.
Një zyrtar i Policisë ka thënë ditën e djeshme se “Fadil Bami dhe Eduart Gjata, bashkë me dy persona të shpallur në kërkim, sillnin sasi heroine nga Turqia përmes Kosovës ose përmes pikave kufitare në Jug të vendit”.
Ata, sipas hetuesve, merrnin porosi të ndryshme për sasi droge mbi dy kilogramë dhe më pas kryenin tërheqjen e heroinës nga Shqipëria për t’ua dorëzuar grupeve të ndryshme në Tiranë.
Policia duket se ka marrë informacion për këtë çështje në maj të këtij viti dhe i ka mbajtur të dyshuarit në vëzhgim. Për këtë arsye, tri ditë më parë, Policia arriti të kapte Fadil Bamin dhe personin tjetër me 10 pako droge, në të cilat ishin plot 5.1 kilogramë pluhur i dyshuar si heroinë.
“Agjentët e operacioneve speciale dhe antidrogës, të cilët i mbanin nën vëzhgim të dyshuarit, i ndaluan në një lokal në brendësi të një kompleksi pallatesh të reja, në zonën e ishParkut, në momentin që po kryenin shkëmbimin dhe shitjen e lëndës narkotike. Në kërkim janë dhe dy bashkëpunëtorë të tjerë, të cilët janë të identifikuar nga ana e Policisë”, deklaroi tri ditë më parë zv.drejtori i Policisë së Tiranës, Ermal Muçaj.
Ai bëri me dije se gjatë aksionit “Summer 2016”, ku ranë në pranga Fadil Bami dhe Eduart Gjata, janë sekuestruar: 5.1 kg lëndë e dyshuar si heroinë, një armë zjarri kallashnikov, dokumentacion me të dhëna huadhënieje, dy krehra me fishekë dhe 1 automjet tip “Volswagen”.
