Fox News, NBC dhe Facebook e kanë tërhequr spotin e kampanjës së Trumpit, duke e konsideruar atë si spot me përmbajtje raciste. Spoti 30 sekondësh kundër migrimit, i cili u pagua nga organizuesit e kampanjës së Trumpit, ishte publikuar në Twitter javën e kaluar nga Trumpi dhe poashtu ishte transmetuar në televizionin NBC, gjatë një ndeshjeje të NFL-së të dielën në mbrëmje, si dhe në “Fox News”.
Në anën tjetër, televizioni “CNN” më herët kishte refuzuar që ta transmetojë këtë spot, të cilin e përshkruan si racist. Spoti paraqet një përpjekje që ta ndalojë karvanin e migrantëve dhe refugjatëve që po kërkojnë azil në Shtetet e Bashkuara. Kjo kampanjë po mbështetet në një ngjarje tragjike të vitit 2014, kur një migrues pa dokumente nga Meksika i vrau dy zyrtarë policorë.
I pyetur të hënën rreth refuzimit për ta transmetuar spotin e tij, Trumpi deklaroi: “Nuk di asgjë për të. Ne kemi shumë spote. Shumë gjëra janë fyese.” Lidhur me këtë refuzim u deklarua edhe Joe Benarroch, zëdhënës i NBC-së, i cili tha: “Pas rishikimit të hollësishëm, ne vlerësuam se ky spot ka një natyrë të vrazhdë dhe kemi vendosur që ta ndrërpresim transmetimin e tij në kanalet tona sa më shpejt që është e mundur.”
Ky spot paraqet një tërheqje të vërejtjes për rrezikun e ardhjes së rreth 7000 migrantëve drejt kufirit amerikan. Në spot thuhet: “Kriminelët e rrezikshëm, siç është vrasësi i policëve, Luis Bracamontes, nuk mërziten për ligjet tona”. Aty pastaj bëhet thirrje që të votohet Partia Republikane, ndërsa spoti përfundon me paraqitjen e Trumpit, i cili thotë: “Unë e miratoj këtë porosi”.
Facebook ka publikuar një deklaratë, ku thuhet: “Ky spot i shkel rregullat e publikimit të spoteve në Facebook, prandaj ne po e refuzojmë atë. Ndonëse kjo video lejohet të postohet në Facebook, ajo nuk mund të jetë në mesin e spoteve të sponzorizuara”, shkruan “The Guardian”. /Gazeta Express/ma.me
