Këtë të dielë Forcat e Armatosura kanë vijuar aksionet për shpëtimin e personave që rrezikonin jetën për shkak të kushteve të vështira atmosferike në zonat e thella veriore të vendit. Helikopteri Cougar i FA-ve ka kryer disa operacione shpëtimi, fillimisht në fshatin Iballë të Pukës, ku ndodheshin 3 persona të izoluar në një minierë, të cilët pasi u shpëtuan u morën dhe u transportuan në Pukë.
Helikopteri i dytë “Cougar” u ul fshatin Konaj të Fanit për të transportuar një grua shtatzënë. Por, ajo refuzoi të hipë në helikopter dhe për këtë arsye ekipi u kthye pa njeri në bord.
Rama ka postuar në rrjetin e tij social një foto të ekipit të shpëtimit së bashku me minatorët, duke falenderuar efektivët e FA-ve.
“Faleminderit Forcave të Armatosura që sot përsëri u treguan në lartësinë e detyrës dhe në një operacion aspak të lehtë shpëtuan njerëz të izoluar në dëborë nga rreziku për jetën”– shkruan Rama/java/a.k
