Një tjetër fatkeqësi ka ndjekur pilotin gjerman të Ferrarit, Sebastian Vettel, i cili përveç se iu desh të nisej nga vendi i 9 për një ndërrim mekanik në njëvendëshen e tij, pikërisht atëherë kur ishte në kryesimin e garës së Çmimit të Madh të Austrisë, e braktis atë në xhiron e 27.
Edhe pse kryesonte për shkak se nuk e kishte zhvilluar ende “pit stop”-in e parë, Vettel u bë viktimë e shpërthimit të gomës së përparme nga krahu i djathtë, duke shkaktuar edhe futjen e makinës së sigurisë për 4 xhiro.
Pas provave zyrtare spektakolare, të zhvilluara mes incidenteve, reshjeve të shiut dhe vendimeve strategjike të skuderive, edhe gara pritej të kishte një fillim shpërthyes. Nga vija e parë e startit u nisën Hamilton, fitues i “pole position”-it një ditë më parë, por këtë radhë jo i ndjekur nga kolegu i tij Nico Rosberg, i cili për shkak të një penalizimi për ndryshimin e kambios u desh të nisej nga vendi i shtatë.
Gara është ende në zhvillim, por në momentin e daljes së Vettelit dhe futjes së makinës së sigurisë “Safety Car”, renditja e 10 të parëve ishte si më poshtë: Rosberg, Hamilton, Verstappen, Ricciardo, Raikkonen, Bottas, Nasr, Button, Grosjean, Magnussen.
Reagon Vettel
“E ndieva fundosjen e makinës, por goma shpërtheu nga hiçgjë, papritur e pakujtuar, – thotë Sebastian. – Gjithçka ishte normale, dukej sikur çdo gjë e kisha nën kontroll, madje edhe ritmi i garës ishte normal. Shpërbërje? Nuk e di çfarë ndodhi, deri në atë moment performanca ime ishte konstante dhe nuk kisha marrë asnjë sinjal negativ mbi çështjen e gomave”.
Më tej Vettel shpjegon edhe strategjinë e ekipit. “Kishim menduar që të bënim vetëm një ndalesë dhe të shkonim sa më gjatë të mundeshim me gomat e para, por tashmë kam mbetur pa fjalë dhe nuk kam çfarë të shtoj. Mbetet ende mister për mua, se përse goma dështoi në këtë farë mënyre”./TCH/a.k
