Futbolli Italian u përfshi nga një tjetër skandal, ku gjatë ditës së djeshme prokuroria e Napolit nisi hetimin me akuzën e evazionit fiskal ndaj disa drejtuesish të lartë klubesh ndër to administratori i Milanit Galliani, presidenti i Lacios Lotito, ai i Napolit De Laurentis dhe ish- numri 1 i Juventusit Jean Claude Blanc.
Hetimet janë të fokusuara tek transferimet e disa futbollistëve, një pjesë e të cilëve mjaft të evidentuar, si Lavezzi, Milito, Denis, Immobile e Nocerino.
Në fillim nuk figuroi asnjë shqiptar, por në një njoftim të dytë më të detajuar ka dalë edhe emri i ish-sulmuesit të kombëtares kuq e zi Erjon Bogdani.
Hetimi i 3 prokurorëve të çështjes Di Simone, Ranieri dhe Capuano është përqëndruar tek kontrata e transferimit të Bogdanit nga Chievo tek Cesena në vitin 2010.
E gjithë çështja ka të bëjë me të drejtat e marketingut dhe në këtë pikë nuk po hetohet drejtpërdejtë zv.trajneri i kombëtares shqiptare, por përgjegjësitë sipas organit të akuzës i takojnë menaxherit Alessandro Moggi dhe proçedurave kontraktuale, gjithnjë nëse vërtetohet se ka pasur evazion fiskal.
Përsa i përket hetimit në tërësi, ai e pati zanafillën kur u vërejtën parregullsi në transferimin e Ezequiel Lavezzit nga Napoli për tek PSG.
Nga ai moment prokurorët kërkuan detajet e kontratës së transferimit, ndërkohë që tashmë kjo çështje është shtrirë në të gjithë Italinë, ku nën hetim janë 64 persona.
