“Partneriteti me Shqipërinë është një nga gurët e çmuar kilometrikë të Europolit”. Kështu deklaroi drejtori i Europolit, Rob Wainwright gjatë takimit që zhvilloi me kreun e Policisë së Shtetit Haki Çako, i cili po zhvillon një vizitë në organizatën e Bashkimit Europian për zbatimin e Ligjit.
Kreu i Europolit e konsideroi të shkëlqyer bashkëpunimin me Shqipërinë dhe theksoi se organizata që ai drejton do të jetë e hapur dhe do të përfshijë Policinë Shqiptare në të gjitha veprimtaritë si shprehje e besimit që tashmë Policia e Shtetit ka fituar tek partnerët ndërkombëtarë.
“Pjesëmarrja e Policisë së Shtetit në pikat fokale të Europolit konsiderohet me rëndësi të madhe dhe një prioritet për Zyrën Kombëtare Europol”, u shpreh Rob Wainwright.
Nga ana e tij, drejtori i Policisë së Shtetit Hako Çako shprehu gatishmërinë dhe vullnetin e tij personal dhe të organizatës që drejton për të rritur bashkëpunimin me partnerët tanë ndërkombëtarë strategjikë dhe ne veçanti me Europolin.
Mësohet se gjatë takimit u trajtuan prioritetet e dy organizatave në luftën kundër fenomeneve kriminale dhe në rritjen e bashkëpunimit mes partnerëve. Krimi i organizuar, Terrorizmi dhe format e tij, si edhe migracioni i paligjshëm ishin ndër më kryesoret në një analizë të shkurtër që dy drejtorët bënë.
Rritja e bashkëpunimit për një shkëmbim informacioni në kohë reale dhe pjesëmarrja në hetimet e përbashkëta, si edhe analiza e riskut sipas kritereve të Europolit përbëjnë mënyrën e luftimit dhe mënyrën e punës që dy organizatat ndjekin në përballjen me fenomenet kriminale.
Në takimin me drejtorin e Europolit, Drejtori i Policisë së Shtetit bëri një përmbledhje të bashkëpunimit të suksesshëm me Europolin që nga nënshkrimi i marrëveshjes operacionale dhe strategjike në dhjetorin e vitit 2013.
Nga momenti i nënshkrimit të marrëveshjes është rritur në mënyrë eksponenciale shkëmbimi i informacioneve dhe tashmë marrim pjesë rregullisht në shumë operacione të përbashkëta me Europolin dhe shkëmbimi i të dhënave nëpërmjet rrjetit të sigurt të Europolit SIENA e ka mundësuar këtë.
Pjesëmarrja e Policisë së Shtetit në pikat fokale të Europolit konsiderohet me rëndësi të madhe dhe një prioritet për Zyrën Kombëtare Europol në linjë me strategjinë e Policisë së Shtetit dhe të detyrimeve që rrjedhin nga Prioritetet e Qeverisë Shqiptare drejt Integrimit Evropian.
Në këtë drejtim Drejtori i Policisë së Shtetit i ka shprehur gatishmërinë dhe vullnetin e tij personal dhe të organizatës që ai drejton të rritë bashkëpunimin me partnerët e saj ndërkombëtarë strategjikë dhe ne veçanti me Europolin.
Në këtë optikë asistenca e Europolit në përmirësimin e analizës kriminale në përgjithësi dhe asaj SOCTA në veçanti si edhe përfshirja e Policisë së Shtetit në hetimet e përbashkëta është një prioritet që Policia e Shtetit është duke kërkuar me vendosmëri dhe duke e ndjekur me këmbëngulje në zbatim të prioriteteve të Qeverisë Shqiptare në luftën kundër krimit të organizuar, terrorizmit dhe formave të tyre si edhe të trafikut të paligjshëm e migracionit të paligjshëm.
Wainwright duke falenderuar Drejtorin e Policisë së Shtetit për këtë vizitë theksoi se partneriteti i Europolit me Shqipërinë është një nga gurët e çmuar “milestone” të organizatës që ai drejton dhe se ai është i nderuar dhe krenar për këtë pasi ka qenë firmëtar i marrëveshjes operacionale dhe strategjike me Shqipërinë.
Duke konfirmuar se bashkëpunimi me Shqipërinë është në nivel të shkëlqyer ai theksoi se Europoli do të jetë i hapur dhe do të përfshijë Policinë Shqiptare në të gjitha veprimtaritë si shprehje e besimit qe tashme ajo ka fituar tek partnerët ndërkombëtarë.
Gjithashtu, ai me kënaqësi pranoi ftesën e bërë nga Drejtori i Policisë shqiptare për të vizituar Shqipërinë së shpejti.
Delegacioni i Policisë së Shtetit në Europol kreu disa takime me përfaqësitë e vendet anëtare që operojnë pranë këtij te fundit ku u trajtuan çështje të interesit reciprok.
Gjithashtu gjatë vizitës në Holandë Drejtori i Policisë së Shtetit u takua edhe me Ambasadoren e Republikes së Shqiperisë në Hagë, Adia Sakiqi. Në takim u bisedua për çështje të përgjithshme ku Policia e Shtetit mbështet misionin diplomatik shqiptar dhe zgjidhjen e disa problematikave qe hasin shtetasit shqiptarë jashtë vendit.
Kjo vizitë e Çakos në Europol, e organizuar me mbështetjen e Misionit e Asistencës së Bashkimit Evropian Pameca IV, vjen pas disa takimesh dhe pjesëmarrjesh në nivel operacional të suksesshme ku Policia e Shtetit ka marrë pjesë krah për krah me partnerin e saj strategjik dhe operacional Europol.
Shqiptarja/d.i.
