Kualifikimi i Kombëtares pritet të sjellë edhe përfitime të ndjeshme financiare për Federatën Shqiptare të Futbollit.
Përfitimi më i madh është ai që buron nga rritja e imazhit. Një pjesë e të ardhurave është ajo që buron nga granti që jep UEFA për ekipet pjesëmarrëse në Euro 2016.
Në këtë rast flasim për një formulë të kombinuar, e cila përbëhet nga një minimum i garantuar dhe një sistem bonus që i garantohet ekipit.
“Baza që ne presim të vijë nga kjo formulë do të jetë diku rreth 70 milionë euro”, shprehet Gazmend Malo, drejtor i Marketingut në FSHF për Top-Channel.
Arka e federatës ka përfituar rreth 300 mijë euro të tjera edhe nga rritja e të ardhurave që merren nga biletat, për shkak të pjesëmarrjes më të madhe të tifozëve.
Rritje 100 për qind të të ardhurave pritet të ketë edhe nga sponsorët, apo kompani të cilat kanë shprehur dëshirën të sponsorizojnë për përfaqësuesen, në një kompeticion ku një ndeshje do të ndiqet nga të paktën 150 mln njerëz.
Pjesëmarrja në Euro 2016, grumbullimi i Kombëtares me të paktën 10 ditë para fillimit të eventit dhe 3 ndeshjet që do të luajnë në grup, sigurisht që do të kenë një kosto financiare për FSHF-në minimalisht 2 milionë euro.
