Operatori i tubacionit të shumëdebatuar Nord Stream 2 nga Rusia në Gjermani – i kritikuar nga disa vende perëndimore si një armë gjeopolitike – njoftoi sot se ka nisur mbushjen e gazsjellësit me gaz.

Ky hap vjen në një kohë kur Evropa përballet me një krizë energjetike, ndërsa rezervat e gazit natyror janë në nivel të ulët dhe çmimet e energjisë rriten.

“Procedura e furnizimit me gaz për vargun e parë të tubacionit Nord Stream 2 ka filluar”, tha Nord Stream 2 AG në një deklaratë.

“Ky varg do të mbushet gradualisht për të ndërtuar inventarin dhe presionin e kërkuar si parakusht për testet teknike të mëvonshme,” tha kompania me bazë në Zvicër, e cila është në pronësi të një filiali të gjigantit rus të gazit Gazprom.

Nord Stream 2 ka ndarë prej vitesh kryeqytetet evropiane dhe ka rritur tensionet midis Bllokut dhe Uashingtonit.

Tubacioni devijon furnizimet nga një rrugë ekzistuese përmes Ukrainës dhe privon vendin aelat të Evropës nga një miliard euro (1.2 miliardë dollarë) në vit në tarifat e tranzitit nga Rusia.

Ukraina – në konflikt me Rusinë që nga aneksimi i Krimesë nga Moska në vitin 2014 – ka paralajmëruar Evropën se Nord Stream 2 mund të përdoret nga Moska si mjet presioni gjeopolitik.

Kur Gazprom njoftoi muajin e kaluar se ndërtimi kishte përfunduar, Kiev u zotua të vazhdonte lobimin kundër projektit “edhe pasi gazi të jetë lëshuar”.

Çmimet e gazit në Evropë janë rritur njëkohësisht, ndërsa sezoni i dimrit po afron. Agjencia Ndërkombëtare e Energjisë i kërkoi Rusisë të hapte rrjedhën e gazit.

Nord Stream 2 nis nga bregu baltik i Rusisë në Gjermaninë verilindore. Tubacioni nënujor, 1.200 kilometra (745 milje) ndjek të njëjtën rrugë si Nord Stream 1, i cili përfundoi mbi një dekadë më parë.

Ashtu si binjaku i tij, Nord Stream 2 do të transportojë 55 miliardë metra kub gaz në vit në Evropë, duke rritur aksesin e kontinentit në gaz natyror relativisht të lirë në një kohë të rënies së prodhimit vendas.

Gjermania, ekonomia kryesore e Evropës, importon rreth 40 për qind të gazit të saj nga Rusia dhe Berlini beson se tubacioni do të ndikojë në tranzicionin e vendit nga qymyri dhe energjia bërthamore.