Skënderbeu luan ndaj Lokomotivës së Moskës në “Elbasan Arena” sfidën e fundit në Grupet e Europa League, një eksperiencë emocionuese kjo për kampionët e Shqipërisë, që pavarësisht se nuk mund të pretendojnë kualifikimin, sipas trajnerit Josa kanë shumë arsye për të kërkuar rezultatin pozitiv.
“Për ne është shumë e rëndësishme ta mbyllim me rezultat pozitiv këtë aventure, ku kemi ende nevojë të rritemi. Luajmë për prestigjin në një kompeticion ku kemi fituar mjaft eksperiencë”.
Më tej, Josa kujton se Skënderbeu luan për të rritur koeficientin e përfaqësimit në Europë, por edhe për të përfituar sa më shumë financiarisht.
“Sigurisht që kemi ende për fituar, pavarësisht se matematikisht jemi eliminuar dhe nuk mund të luajmë në fazën tjetër. Ne dëshirojmë të rritim koeficientin e përfaqësimit tonë në kupat e Europës dhe të mos harrojmë që edhe financiarisht do të përfitojmë nëse arrijmë të marrim rezultat pozitiv”.
Ndonëse luhet në “Elbasan Arena”, Josa pret një kundërshtar shumë më të fortë se në ndeshjen e Moskës, për faktin e thjeshtë se e njeh më mirë lojën e Skëndërbeut.
“Lokomotiva do të jetë më e organizuar sepse tani na njeh më mirë. Mendoj se është befasuar nga paraqitja jonë në ndeshjen e parë, kështu që do të jetë më e përgatitur për këtë sfidë”.
Përkrah Josës, në konferencë për shtyp u shfaq edhe Marko Radas, i cili e konsideron mjaft pozitive eksperiencën e parë europiane të Skënderbeut.
“Ishte eksperienca jonë e parë në Europa League dhe mendoj se ka qenë pozitive. Luajtëm në një kompeticion shumë të rëndësishëm ku jemi rritur shumë si futbollistë dhe klub”.
Mbrojtësi kroat, i pyetur për mundësinë e një kundëpërgjigjjeje të tifozërisë korçare për koret raciste të mbështetësave të Lokomotivës, u përgjijg:
“Sjelljet raciste nuk kanë vend në asnjë stadium të botës. Unë besoj se në “Elbasan Arena” gjithçka do të jetë në rregull si në fushë edhe në tribuna”.
Supersport
