Teksa kërkohet nga SPAK si pjesë e një grupi kriminal që paracaktonte fituesit e tenderave tek AKSHI, Ergys Agasi mohoi përmes avokatit të gjitha akuzat e ngritura ndaj tij.
Avokati Maks Haxhia tha se klienti i tij nuk po i fshihej drejtësisë. Për videoregjistrimet e disa takimeve në një zyrë në pronësi të Agasit, të administruara nga SPAK, avokati tha se pajisja ka pasur qëllime sigurie.
Gjykata e Posaçme ka lëshuar një urdhër-arresti ndaj Agasit më 15 dhjetor. Ai dyshohet të jetë pjesë e një grupi kriminal, që kishte në përbërje edhe zyrtarë të AKSHI-t dhe Policisë së Shtetit, kanë paracaktuar fituesit në procedura tenderuese, si edhe përdorur dhunën dhe pengmarjen për të shmangur kompanitë garuese që mund t’ju bëheshin pengesë në procedurat tenderuese.
