Kukësi do të ndeshet me Austrinë e Vienës në stadiumin “Ernst Happel”, për raundin e dytë kualifikues të Europa League. Austria normalisht hyn si favorite në këtë duel por pavarsisht kësaj trajneri i formacionit vienez, Thorsten Fink, nuk i zë aspak besë Kukësit, madje i trembet skuadrës verilindore.
“Nuk duhet ta nënvlerësojmë Kukësin. Ata janë një kundërshtar i pakëndshëm për ne, dhe ndaj tyre nëse nuk tregohemi të vëmendshëm vetëm mund të humbasim. I kam ndjekur ndeshjet e tyre ndaj Rudarit. Kukësit ka një skuadër të mirë dhe ata do të vinë këtu për të luftuar si të barabartë në fushë. Ne duam të kemi një rrugë të gjatë në Europë gjatë këtij sezoni por fillimisht duhet të mendojmë vetëm për Kukësin sepse nëse i nënvlerësojmë mund ta pësojmë”.
Prova e vërtetë e Austrisë së Vienës përpara ndeshjes ndaj Kukësit ka qenë ajo e disa ditëve më parë ndaj gjermanëve të Munich 1860, takim miqësor të cilin skuadra austriake e fitoi me rezultatin 2-0. Ish-lojtari i Bayernit, Thorsten Fink u shpreh i kënaqur me formën që ka shfaqur skuadra e tij gjatë kësaj periudhe, por shtoi gjithashtu se ka ende shumë gjëra që duhen përmirësuar duke filluar që nga ndeshja e radhës.
SS/d.i.
