Valuta europiane është në rënie të thepisur në tregun vendas të këmbimit valutor, që prej gjysmës së dytë të korrikut, kur ka nisur edhe piku i sezonit turistik.
Në më pak se 10 ditë, euro ka humbur 0.82 pikë kundrejt lekut dhe shënon sot nivelin e 121.68 lekëve, më i ulëti që nga Janari i 2020-ës.
Të dhënat e detajuara të Bankës së Shqipërisë, e caktojnë çmimin mesatar të blerjes së euros në 121.96 lekë dhe atë të shitjes, pra konvertimit të euros në lekë, në 121.41 lekë.
Agjentët e tregut shprehen se zhvlerësimi i euros lidhet me ofertën e shtuar, për shkak të turistëve të huaj që vijnë nga Kosova dhe vendet e Bashkimit Europian.
Gjatë javës së kaluar Banka e Shqipërisë zhvilloi një ankand për blerjen e 10.7 milionë eurove në tregu, por pa ndikuar në zbutjen e forcimit të lekut. Ky ishte ankandi i tetë i këtij lloji këtë vit, teksa priten edhe 6 ndërhyrje të tjera deri në fund të vitit.
Pritshmëritë janë që zhvlerësimi të vijojë deri në fund të muajit Gusht, kur pritet vala më e madhe e hyrjeve të pushuesve dhe emigrantëve që rikthehen në vend.
/b.h
