Policia ka vënë në pranga dy shpërndarës të lëndëve narkotike. Gjatë dy operacioneve të koduar “Mapo” dhe “Shigjeta 3”, u sekuestruan 42 doza me lëndë narkotike kokainë e kanabis, lekë dhe euro të përfituara nga shitja e lëndës narkotike në doza.
Burime policore bëjnë me dije se në pranga është vënë 24-vjeçari me iniciale A. Xh., banues në Tiranë, i cili u kap në flagrancë në rrugën “Hamdi Cenoimeri” me doza lënde të dyshuar narkotike kokainë.
Pas kontrollit të ushtruar në banesën e tij u gjetën doza të tjera me lëndë të dyshuar narkotike kokainë e kanabis.
Policia i sekuestroi në total 3 doza me lëndë të dyshuar narkotike kokainë; 31 doza me lëndë të dyshuar narkotike kanabis dhe 1 aparat celular.
Po gjatë orëve të fundit u arrestua 21-vjeçari me iniciale G. L., banues në Rrëshen. Gjatë kontrollit të ushtruar në mjetin me të cilin ai po lëvizte, policia gjeti 8 doza me lëndë të dyshuar narkotike kokainë.
Atij ju sekuestruan në cilësinë e provës materiale: 8 doza me lëndë të dyshuar narkotike kokainë, një mjet, një aparat celular, 34 400 lekë të reja dhe 315 euro (të dyshuara të përfituara nga shitja e dozave me lëndë narkotike).
Materialet procedurale iu referuan për veprime të mëtejshme Prokurorisë së Rrethit Gjyqësor Tiranë për veprën penale “Prodhim dhe shitje lëndësh narkotike” në ngarkim të shtetasve të lartpërmendur.
