Ligjvënësit e kanë gozhduar EULEX-in të premten, para se të jepnin votën për t’ia vazhduar mandatin edhe për dy vjet. Kritikat më të mëdha lidhen me mosndëshkimin e krimeve të kryera nga serbët, shkruan Koha Ditore.
Prej dy ditësh ky mision evropian ka qëndruar në Kosovë pa bazë ligjore, ngaqë mandati i ka skaduar më 15 qershor.
Diskutimet midis Prishtinës e Brukselit përkitazi me qëndrimin e mëtejmë të EULEX-it kanë nisur që vitin e shkuar, por vetëm një ditë më parë ka mundur të mbërrihej dakordimi për formën se si ndërkombëtarëve mund t’i kalohen rastet e reja në rrethana të jashtëzakonshme.
Dhe në Kuvend deputetët nuk kanë marrë përgjigje nëse është definuar se çka do të konsiderohet rrethanë e jashtëzakonshme. (b.an)
