Presidenti rus Vladimir Putin tha të premten se e ka ftuar presidentin amerikan Donald Trump në Moskë dhe se të dy ishin të gatshëm për takime të mëtejshme të nivelit të lartë, por se duhet të krijoheshin kushtet e përshtatshme për mbajtjen e takimit.
Presidentët Trump dhe Putin u takuan në Helsinki javën e kaluar, por Trump u përball me kritika të ashpra në Shtetet e Bashkuara pasi u duk sikur e pranoi pretendimin e zotit Putin se Rusia nuk kishte ndërhyrë në zgjedhjet e vitit 2016 në Shtetet e Bashkuara.
Duke folur para gazetarëve në një takim të vendeve në zhvillim në Afrikën e Jugut, Putini tha se bisedat telefonike mes Moskës dhe Washingtonit ishin të pamjaftueshme dhe se të dyja palët duhet të takoheshin për të folur për çështje si marrëveshja bërthamore me Iranin dhe konfliktet globale.
Komentet e Putinit u bënë pasi Shtëpia e Bardhë u zmbraps nga sugjerimi i Trumpit se Putini mund të vinte për vizitë në Washington këtë vjeshtë.
Më pas Këshilltari i Sigurisë Kombëtare John Bolton tha se nuk do të mbahej asnjë takim para se të mbyllej hetimi i posaçëm për bashkëpunimin e mundshëm mes Trumpit dhe Rusisë, që do të thotë se takimi nuk do të mbahej para vitit 2019, përgatiti Koha. (b.an)
