I ftuar në studion e emisionit “Trialog” në RTSh, moderuar nga Alba Alishani, ish-deputeti i Partisë Demokratike, Ervin Salianji komentoi situatën politike në Shqipëri duke e krahasuar atë me modelin hungarez.
Salianji u shpreh se modeli i Viktor Orbán është thuajse identik me atë shqiptar, duke e cilësuar liderin hungarez si një autokrat tipik që kishte përqendruar pushtetin në duart e tij.
Ai theksoi se, ndryshe nga Hungaria, në Shqipëri ekzistojnë disa institucione si KLGJ dhe KLP që marrin vendimmarrje, ndërsa në modelin hungarez këto kompetenca ishin përqendruar te një person i vetëm që emëronte gjyqtarët dhe prokurorët.
Në vijim, Salianji theksoi se asnjë pushtet apo autokrat nuk mund t’i bëjë ballë forcës së popullit, duke sjellë si shembull një lider të ri që brenda pak vitesh arriti të përmbyste një sistem të tillë dhe të siguronte një shumicë të konsiderueshme votash.
“Nuk ka modele që i ngjajnë njëra tjetrës por modeli i Hungarisë është thuajse identik me modelin shqiptar, madje Viktor Orban për atë që përfaqësonte është autokrat tipik, kontrollonte 80% të mediave, ekonominë, kontrollonte gjithë sistemin politik, kishte arritur që të ndryshonte sistemin zgjedhor dhe ta përshtaste sipas nevojave të veta ku favorizohej partia e vet, ndryshe nga Shqipëria ku ka disa institucione që marrin vendimmarrjen siç është KLGj, KLP etj. me ndryshimet kushtetuese Orban e përqendroi tek një njeri i përzgjedhur prej tij , praktikisht ishte njeriu që emëronte gjyqtarët dhe prokurorët nga ana tjetër kishte një mbështetje të hapur me presidentin e SHBA por edhe me atë të Rusisë dhe pavarësisht të gjithë këtyre elementëve nuk i bën ballë asnjë autokrat apo pushtet forcës së p9opullit. Një 45 vjeçar për 6 vite arriti ta rrezonte dhe të merrte 2/3 e votave dhe ky rast mund të merret si model për Shqipërinë”, u shpreh Salianji.
Duke u ndalur te opozita në Shqipëri, ai u shpreh se Partia Demokratike, si forca kryesore opozitare, mund të arrijë ndryshimin nëse reformon lidershipin dhe tejkalon pengesat e një sistemi që e cilësoi gjysmë hibrid. Sipas tij, problemi kryesor mbetet mungesa e epërsisë morale të opozitës dhe prania e një lidershipi të vjetër politik.
“Partia demokratike, si forca kryesore opozitare nëse bën ndryshim të lidershipit dhe arrin të tejkalojë të gjitha këto avantazhet që sjell një sistem gjysmë hibrid arrin që ta mund. E kemi thënë shpesh se pengesa kryesore për të bërë ndryshim në Shqipëri është mungesa e epërsisë morale të opozitës. Kemi një lider shumë të vjetër politik”, tha ai.
