Eros Grezda mund të realizojë një transferim të bujshëm gjatë ditëve të fundit të merkatos në Europë, pasi për shërbimet e mesfushorit të përfaqësueses shqiptare interesohet një emër shumë i njohur i futbollit botëror, Stiven Xherard, i cili kërkon ta bëjë pjesë të Rejnxhërs që drejton në Skoci.
Lajmi i papritur është përhapur në mediat kroate dhe më pas ato britaniku, ku insistohet se mesfushori i përfaqësueses shqiptare ka nisur bisedimet dhe ndonëse nuk ka luajtur ende asnjë minutë këtë sezon te Osijek për shkak të riaftësimit nga një dëmtim, është shumë pranë këtij transferimi që do t’i mundësonte hapin e radhës në karrierë.
I njëjti burim sqaron se Grezda mund t’i kushtojë rreth 3 milionë euro klubit skocez i cili dëshiron të përforcohet që të rivalizojë me Sëlltikun në kampionat dhe të paraqitet sa më mirë në Europë, shkruan “Vipsport”.
Klubi skocez kërkon me ngulm lojtarë krahu dhe Xherard mendon se Grezda është një opsion i mirë pasi ka treguar se mund të luajë si në të majtën ashtu edhe në të djathtën, pasi luan me të dy këmbët.
a.ç
