Kur ishte fëmijë, Ermal Meta mbërriti në Bari si një emigrant. Italia i dha një mundësi dhe sot ai është një nga kantautorët më të mirë në Itali.
Nëse atëherë italianët do t’i mbyllnin dyert, askush nuk e di se cili do të ishte fati i tij. Me eksperiencën e një emigranti në shpinë, ai nuk mund të mos jetë veçse kundër vendimeve të ministrit të brendshëm italian, Matteo Salvini, që u mbyll portat anijeve të refugjatëve që vijnë nga Libia.
“Nëse kjo që po ndodh tani në Itali do të kishte ndodhur 24 vjet më parë, nuk do të isha këtu, duke shkruar këngë, duke bërë muzikë, duke dalë në ekrane e duke performuar nëpër koncerte. Dhe si unë, edhe shumë të tjerë”. Kështu do të shprehej Ermal Meta, kantautori me origjinë shqiptare, që po korr një sukses të jashtëzakonshëm në Itali, sidomos pas fitores në Festivalin e Sanremos. Këngëtari që fitoi aktivitetin më të rëndësishëm të muzikës italiane, së bashku me Fabrizio Moron, kujton mbërritjen në Itali, në Bari, teksa largohej nga Shqipëria, së bashku me të ëmën, vëllanë dhe të motrën. Ishte viti 1994 dhe ishte vetëm 13 vjeç.
“Kufijtë ekzistojnë, por di të them që ekzistojnë së pari njerëzit, pastaj kufijtë dhe i duhet dhënë një mundësi jetës”, shton ai. Siç raporton “La Repubblica”, kantautori shqiptar është pozicionuar kundër vendimit të marrë nga ministri i Brendshëm italian, Matteo Salvini, për mbylljen e kufijve për emigrantët.
“Jam ndier keq kur kam lexuar lajmet së fundi. Nuk ekziston një e drejtë ‘lindjeje’ më shumë se një tjetër. Sot, një pjesë e botës vuan dhe kërkon të shpëtojë pikërisht ekzistencën, të mos vdesë. Shumë vite më parë, kjo pjesë e botës më takonte, sepse unë isha pjesë e saj. Dhe zgjidhjet nuk duan që t’i gjejnë. Ky stanjacion i të menduarit më kall frikën”, është shprehur Meta për “Donna Moderna”.
Por duket se “përplasja” mes metës dhe Salvinit ka nisur më herët. Ky i fundit ka shprehur një lloj pakënaqësie ndaj fitores së Metës në Sanremo. “Dje u mbyll Sanremo dhe ka fituar dyshja e antiterrorizmit Meta e Moro, por kishte edhe një tufë këngësh që flisnin për emigrantët që arratisen, që vijnë, që shpëtojnë. Ndoshta vitin e ardhshëm do të jetë një që flet për viktimat e tërmetit, që janë italianë të harruar”, është shprehur në muajin shkurt sekretari i Legës, Salvini, duke shtuar se do të ishte më mirë që të merreshin me problemet e italianëve sesa të të ardhurve.
Artistët italianë: Ne nuk jemi me Salvinin
Çdo ditë e më shumë, artistët italianë po shprehen kundër politikave të qeverisë italiane, kundër masave të ndërmarra nga Matteo Salvini dhe po ngrenë zërin kundër racizmit që po demonstrohet në Itali. Pas episodeve më të fundit të racizmit në Itali, edhe këngëtarja e madhe italiane, Fiorella Mannoia, ka shprehur mendimin e saj, më së shumti lidhur me sulmin ndaj atletes së kombëtares italiane, me origjinë nigeriane, Daisy Osakue, e cila është goditur në fytyrë nga një grup djemsh, duke rrezikuar pjesëmarrjen në aktivitetin e radhës në Berlin. “Ç’rracë njerëzish jeni? Puna e ‘ministrit të frikës’ po jep frytet e veta, po vihet në jetë ditë pas jete.
Përgëzime! Tanimë duhet të jetë i kënaqur”, shkruan Mannoia në rrjetet sociale. Në 6 korrik, gjatë një koncerti në Comaçhio, Nina Zilli ka lëshuar një sharje kundër Salvinit. Këngëtarja ka kërkuar ndjesë, por ka shtuar se: “I qëndroj mendimit tim, nuk mund të kapesh pas fëmijëve dhe atyre që duan t’i shpëtojnë luftës”. Edhe reperi italo-tunizian Ghali është shprehur kundër zgjidhjeve të ministrit. Më herët, artistja italo-amerikane e muzikës xhaz, Rossana Casale, u shpreh mbi çështjen e anijes “Aquarius”, së cilës iu mohua ankorimi në portet italiane.
“Merrini fëmijët e salvonit dhe vendosini mbi ‘Aquaris’. Tani!”. Gjatë atyre ditëve, Pearl Jam, gjatë një koncerti në Stadio Olimpico në Romë, kanë kënduar një variant të këngës “Imagine” të John Lennon, ku në ekrane të mëdhenj shkruhej “#apriteiporti” dhe “#saveisnotacrime” (“hapni portat” dhe “shpëtimi nuk është një krim”) Në fillim të muajit korrik, këngëtarë të njohur janë bërë pjesë e një fushate të revistës “Rolling Stone”: “Noi non stiamo con Salvini” (“Ne nuk jemi me Salvinin”. Mes tyre, përveç Ermal Metës, u bënë pjesë edhe Caparezza, Elisa, Emma, Francesca Michielin, etj.
ma.me
