Presidenti i Turqisë, Recep Tayyip Erdoğan, ka dënuar situatën humanitare në Rripin e Gazës, duke e krahasuar atë me një “kamp përqendrimi” dhe duke theksuar veçanërisht vuajtjet e fëmijëve. Në një fjalim emocional, ai shprehu dhimbjen e tij personale “si baba dhe si gjysh që i do shumë fëmijët dhe nipërit e tij”.
Duke folur në Asamblenë e Përgjithshme të Kombeve të Bashkuara në New York, Erdogan tha se sot Gaza nuk është vetëm varreza më e madhe e fëmijëve në botë, por edhe vendi me shkallën më të lartë të amputimeve të fëmijëve.
“Duhet ta them këtë nga kjo podium me zemër të rëndë: sot Gaza nuk është vetëm varreza më e madhe e fëmijëve në botë, ajo është edhe vendi me shkallën më të lartë të amputimeve të fëmijëve në botë,” deklaroi ai.
Ai vazhdoi duke e cilësuar Gazën si “kampin më çnjerëzor dhe turpërues të përqendrimit të kohës sonë”.
Këto deklarata vijnë në kontekstin e kritikave të vazhdueshme të presidentit turk ndaj veprimeve ushtarake izraelite në Rripin e Gazës, të cilat ai i ka cilësuar shpesh si “gjenocid” dhe ka krahasuar kushtet e jetesës atje me ato të kampeve naziste, duke i quajtur madje edhe më të rënda.
Në fjalimet e tij të mëparshme, përfshirë ato në Asamblenë e Përgjithshme të Kombeve të Bashkuara dhe në konferenca të tjera ndërkombëtare, Erdogan ka theksuar se fëmijët në Gaza po humbasin jetën jo vetëm nga bombat, por edhe nga uria dhe mungesa e mjekimit.
Ai ka përmendur raste të amputimeve pa anestezi dhe ka thënë se pamjet që dalin nga Gaza janë “më të këqija, më të egra dhe më çnjerëzore” se ato të kampeve naziste. Presidenti turk ka thirrur komunitetin ndërkombëtar, veçanërisht vendet islame, që të ngrenë zërin më fort dhe të ndërmarrin masa konkrete për të ndalur atë që ai e quan “barbarinë” në Gaza.
Turqia, nën udhëheqjen e Erdoganit, ka dërguar dhjetëra mijëra tonë ndihmë humanitare në Gaza, ka pezulluar tregtinë me Izraelin dhe ka mbështetur diplomatikisht kauzën palestineze. Erdogan ka theksuar se “nuk i kemi lënë asnjë moment vetëm vëllezërit tanë në Gaza” dhe se do të vazhdojë përpjekjet për të sjellë para drejtësisë ata që ai i quan përgjegjës për “gjenocidin”.
Erdogan ka përsëritur thirrjen për një armëpushim të menjëhershëm, hyrje të lirë të ndihmave humanitare dhe zgjidhje politike bazuar në dy shtete.
Ai ka nënvizuar se “në Gaza nuk ka luftë, por një politikë të vrasjes në masë”, duke theksuar vuajtjet e civilëve, veçanërisht të fëmijëve.
