Byroja Kombëtare e Hetimit (BKH) ka reaguar pas deklaratës së kryeministrit Edi Rama, i cili tha se disa agjentë të këtij institucioni u paraqitën në godinën e qeverisë dhe se nuk pranuan që të dorëzonin armën, sipas rregullores së sigurisë së lartë të Gardës së Republikës.
Në një njoftim zyrtar, BKH sqaron se ngjarja i referohet datës 20 nëntor 2025, kur tre hetues të saj u paraqitën në ambientet e Këshillit të Ministrave për të ekzekutuar vendimin e Gjykatës së Posaçme, që parashikonte pezullimin nga detyra të zëvendëskryeministres Belinda Balluku.
Sipas BKH-së, në hyrjen e brendshme të institucionit, hetuesit u informuan nga Garda se hyrja me armë zjarri nuk lejohej. Njëri prej tyre kërkoi sqarime për mënyrën e depozitimit të armëve, dhe Garda i orientoi drejt dollapëve të posaçëm të sigurisë.
“Më datë 20 nëntor 2025, tre hetues të Byrosë Kombëtare të Hetimit (BKH) janë paraqitur në ambientet e Këshillit të Ministrave për ekzekutimin e vendimit të Gjykatës së Posaçme së Shkallës së Parë, nr. 118, datë 19.11.2025, përmes të cilit është vendosur masa e pezullimit nga ushtrimi i detyrës ndaj Zëvendëskryeministres, znj. Belinda Balluku.
Në hyrjen e brendshme të Këshillit të Ministrave, hetuesit janë informuar nga Garda e Republikës se sipas rregullave në fuqi, nuk lejohet hyrja me armë zjarri në ambientet e brendshme të institucionit. Njëri prej hetuesve ka kërkuar sqarim mbi mënyrën dhe vendin e depozitimit të armëve. Garda e Republikës i ka orientuar që armët të liheshin në dollapët e posaçëm të sigurisë, në hyrje të institucionit. Pas verifikimit se ambienti i depozitimit ishte i sigurt dhe i monitoruar me kamera, hetuesit kanë depozituar armët dhe kanë vijuar normalisht me kryerjen e veprimeve procedurale”, thuhet në reagim.
Sipas BKH-së, në asnjë moment nuk ka pasur debat apo përplasje mes hetuesve dhe Gardës së Republikës.
“Theksojmë se në asnjë moment nuk ka pasur debat apo përplasje mes hetuesve të BKH-së dhe Gardës së Republikës. E drejta e hetuesve të BKH-së për mbajtjen e armës së zjarrit mbështet tek ligji nr. 25/2019 “Për organizimin dhe funksionimin e Policisë Gjyqësore”, ku neni 31, pika 3, parashikon shprehimisht se oficerët e Policisë Gjyqësore, përfshirë ata të Byrosë Kombëtare të Hetimit, pajisen me armë zjarri sipas legjislacionit në fuqi për përdorimin e tyre”, përfundon reagimi i BKH-së.
Në podcastin “Flasim”, Rama tha se disa efektivë të BKH-së kishin refuzuar të dorëzonin armët në hyrje të Këshillit të Ministrave, në kundërshtim me rregullat e sigurisë. “Si puna e ca trimoshave të BKH-së, për të cilët kam dëgjuar shumë çudira, po kishin ardhur një ditë në godinën e Këshillit të Ministrave, e nuk donin ta linin patllaken tek dera sipas rregullores së sigurisë së lartë, të Gardës së Republikës,” u shpreh Rama.
