Mbi 300 persona janë arrestuar në Greqi që nga fillimi i vitit, të dyshuar si shkaktarë të zjarreve në pyje, duke përfshirë këtu jo vetëm zjarrvënien e qëllimshme, por edhe pakujdesinë.
Sipas zëdhënësit të zjarrfikësve grekë, Giorgos Artopoios, nga këto raste, 272 lidhen me zjarrvënie nga pakujdesia, ndërsa 36 raste dyshohet se janë shkaktuar me dashje.
Një nga rastet e fundit u shënua në ishullin e Kretës, ku një zjarr pranë një zone pyjore dyshohet se nisi pasi një turist kishte ndezur një skarë me qymyr pranë pyllit. Turisti u deklaroi autoriteteve se nuk ishte në dijeni se përdorimi i zjarrit në ambiente të hapura ishte i ndaluar gjatë periudhave me erë të fortë dhe mot të thatë.
Ndërkohë, autoritetet greke paralajmërojnë për rritje të rrezikut nga zjarret për shkak të thatësirës, erërave të forta dhe temperaturave ekstreme. Në ditët në vijim, në pjesën më të madhe të vendit priten temperatura mbi 40 gradë Celsius, ndërsa vala e të nxehtit pritet të zgjasë deri në mesin e javës së ardhshme. Kushtet e vështira atmosferike favorizojnë përhapjen e shpejtë të flakëve, duke rritur gatishmërinë e shërbimeve të emergjencës.
Greqia po përpiqet ndërkohë të forcojë edhe mbrojtjen e monumenteve historike. Me qëllimin të parandalohen dëmet nga zjarret në zonat me rëndësi kulturore, autoritetet greke kanë nisur instalimin e një sistemi modern monitorimi dhe alarmi për zbulimin e hershëm të zjarreve. Sistemi është testuar me sukses pranë Akropolit të Mikenës, në gadishullin e Peloponezit, dhe do të vendoset në 22 qendra historike në të gjithë vendin.
Pajisjet përfshijnë kamera optike dhe termike, disa prej të cilave ofrojnë pamje panoramike 360 gradë. Ato mund të monitorojnë zona të mëdha dhe të identifikojnë shenja të hershme të zjarrit. Deri në fund të gushtit pritet të aktivizohen gjashtë sisteme të reja, ndërsa tetë sisteme të tjera pritet të instalohen gjatë muajit shtator.
