Policia e Tiranës njoftoi këtë të martë se ka finalizuar nën drejtimin e SPAK operacionin e koduar “Fraud” dhe ka ekzekutuar një vendim të Gjykatës për Korrupsionin dhe Krimin e Organizuar.
Uniformat blu thonë se kanë sekuestruar 4 pasuri të paluajtshme me vlerë rreth 1.2 milionë euro të 42-vjeçarit, Erjon Kasmi me precedentë për mashtrim kompjuterik në bursa. Dyshohet se pasuritë janë krijuar nga veprimtaria kriminale e 42-vjeçarit. Bëhet fjalë për 1 apartament, 1 subjekt tregtar dhe 2 vendparkime
Konkretisht, u vendos sekuestro mbi 1 apartament, 2 vendparkime për automjete dhe 1 subjekt tregtar, pasuri të cilat dyshohet se rrjedhin nga veprimtaria kriminale e 42-vjeçarit, në fushën e mashtrimit kompjuterik, në bursa”, njoftoi policia.
Erjon Kasmi është dënuar me 7 vite e 4 muaj burgim me gjykim të shkurtuar në Korrik të vitit 2024.
Prokuroria e Posaçme e akuzonte atë si organizator i një grupi prej disa personash se nëpërmjet premtimeve për fitime të majme përvetësuan 7 milionë Euro nga qytetarë të ndryshëm Europianë. Pre e mashtrimeve të “call center”-it që ai ishte administrator kanë rënë që prej vitit 2018 me qindra qytetarë gjermanë dhe të vende të tjera të BE-së.
Në lidhje me këtë rast, GJKKO dënoi edhe Xhulian Xhafën, specialist i IT-së, ndërsa shpalli të pafajshëm të gjithë punonjësit e “call center”-it në fjalë.
Por si funksiononte skema?
Punonjësit përdornin dy platformat “BrokerZ” dhe “Globalix”, për të zhvilluar aktivitetin e tyre. Ata ftonin qytetarët e huaj të investonin në bursa ndërkombëtare. Paratë depozitoheshin sipas udhëzimeve të agjentëve të “call center” në platformat mashtruese.
Nga hetimi rezultoi se depozitat gjendeshin në banka të ndryshme si në Bullgari, Lituani, Poloni e Qipro. Më pas ato zhdukeshin nëpërmjet transfertave të njëpasnjëshme ose konvertimit në kriptovalutë. Nga hetimi është provuar se një pjesë e këtyre parave përfunduan në llogaritë e të pandehurve në Shqipëri.
Erjon Kasmit iu sekuestruan rreth 580 mijë Euro dhe 19 milionë Lekë në llogaritë e tij. Në një bankë të Kosovës atij iu sekuestrua vlera 1 milionë e 500 mijë Euro.
