Tre të paraburgosurit që dhunuan punonjësit e policisë në detyrë në IEVP Peqin, po vlerësohen për të kaluar në regjimin 41/BIS për 90 ditë.
Bëhet fjalë për shtetasit Kastriot Likja, Arlind Daja dhe Kreshnik Ibraliu. Në një reagim të Ministrisë së Drejtësisë, thuhet se drejtuesit e IEVP Peqinit kanë marrë vendimin për pëjashtimin e tyre për 14 ditë nga çdo aktivitet i përbashkët në burg.
Çështja u referua në prokurori dhe ka nisur vlerësimi nëse ndonjëri prej tre të paraburgosurve plotëson elementët për të kaluar në rregjimin 41/BIS.
Reagimi i Ministrisë së Drejtësisë
Pas incidentit të ndodhur në IEVP Peqin, ku tre të paraburgosur K.L, K.I dhe A.D goditën punonjësit e policisë në detyrë, nga ana e drejtuesve të IEVP Peqin dhe gjithë zinxhirit drejtues të burgjeve u morën këto masa:
- a) Përjashtimi i tre të paraburgosurve për 14 ditë nga çdo aktivitet i përbashkët në IEVP Peqin.
- b) Përgatitja e praktikës për 3 të paraburgosurit për kalimin e tyre në rregjimin e veçantë për 90 ditë.
- c) Referimi i çështjes në prokurori për të tre të paraburgosurit.
- d) Ka nisur vlerësimi nëse ndonjëri prej tre të paraburgosurve plotëson elementët për të kaluar në rregjimin 41/BIS.
Rebelimi i të paraburgosurve
Kastriot Likja, Arlind Daja dhe Kreshnik Ibraliu u ngritën në revoltë ditën e enjte.
Ata nuk i janë bindur urdhrave të gardianëve dhe në momentin që kanë hyrë policët për t’i ndaluar, i kanë goditur.
Shërbimi i Kontrollit të Brendshëm të Burgjeve dërgoi urgjent grup pune në burgun e Peqinit për të rivendosur rendin.
/e.d
