Nga Ylli Pata
Kungulleshat e emrave që po qarkullojnë këto ditë festive nga politikanët e opozitës janë më shumë se cinike.
Madje edhe Adriatik Lapaj ka propozuar emra intelektualësh të njohur si alternativa për kryeministri teknikë. Ndër ta ka përmendur Përparim Kabon dhe Tritan Kalon. Po nëse Lapaj, ishte aq i dashuruar ndaj intelektualëve të njohur të këtij vendi, përse nuk i përfshiu ato në listat e kandidatëve për deputetë apo si këshilltrë bashkiakë në zgjedhjet e pjesshme?
Por bëri deputete tezen e tij, e cila nuk di të formojë një fjali të thjeshtë në shqip kryefjalë, kallëzues, kundrinor, pa e përkthyer nga greqishtja?
Pse Tiku nuk bëri deputet profesor Kabon apo Doktor Kalon? Shumë e thjeshtë, nuk deshi! Ndryshe i kishte të gjitha mundësitë.
Partitë e reja nuk se kanë ofruar ndonjë mundësi intelektuale të grupit të tyre politik, e kjo nuk se është ndonjë problem i madh. Partitë, nuk janë akademi, po rata i japin mundësi shkencës, ajkës, elitës të shprehet në bazë të një politikë mbështetëse. Ose nëse nuk i japin, në politikat e tyre qeverisëse, partitë shfaqin programin në dobi të trurit të kombit.
Politika nuk është një Akademi shkencore, është një bërthamë idesh, e cila nuk kërkon me ngulm ardhjen e trurit, por i jep kësaj pjese të mirë të kombit një ide, një alternativë.
Po përse sot ka shpërthyer një delir opozitar ndaj emrave “teknikë” për t’i sjellë si alternativa për një zhvillim të ri politik në vend?
Sepse e kuptojnë se shqiptarët nuk i besojnë as Sali Berishës as Adriatik Lapajt, e ndaj kërkojnë të kontrabandojnë emra jashtë gardhit të tyre.
I do Tiku emrat që propozoi për emra teknikë? Ti fusë në listat e tyre për deputetë, madje t’i shpallë tani. Ndryshe, e gjithë kjo logjikë është një hipokrizi e turpshme.
Protestat që Lapaj bën ndaj qeverisë janë një gjë krejt tjetër, ndaj asaj që ai propozon për një alternativë qeverisëse. Lapaj sot po proteston për të larguar Edi Ramën, këtu mund të ketë mjaft diskutime, por n ë fund është në logjikë normale, ok ka të drejtë të protestojë.
Protesta e Lapajt, përkatësisht vendimi për të protestuar, duhet logjikuar tek ky akt. Sa vetë e mbështesin, sa impakt ka protesta dhe çfarë do të arrijë ky aksion. Që do të duhet të marrë edhe një mbështetje apo jo në publik.
Ndërkaq thelbi i këtij aksioni që është shumë i rëndësishëm është kush është Lapaj dhe njerëzit që e mbështesin? Sepse kemi parë në radhët e protestave të tij njerëz shërbimit sekret të kohës së Enver Hoxhës, që dalin si James Bond-a të luftës së ftohtë. Po përtej një panairi mitomanësh, a është opozita një parodi homologe e profesor Pilinçit apo një platformë serioze, kjoështë pyetja?
