Emigrantët, Kroacia mbyll sërish kufirin me Serbinë
Policia kroate ka mbyllur shtatë nga tetë pikat kufitare me Serbinë, pas dyndjes së emigrantëve. Edhe pika në Tovarnik, ku pati më shumë emigrantë, u bllokua.
Më shumë se 11 mijë njerëz kanë hyrë në Kroaci nga Serbia prej së mërkurës. Qindra emigrantë të tjerë janë bllokuar në një tren në Slloveni.
Ata protestuan duke thirrur emrin e Kancelares gjermane Angela Merkel dhe duke kërkuar që të lejohen të shkojnë në Gjermani.
Autoritetet kroate janë përpjekur të strehojnë refugjatët në qendra azili, por numri i madh i tyre ka bërë që shumë persona të mbeten rrugëve. Ministri i Brendshëm kroat, Ranko Ostojic, tha se vendi i tij “është mbushur plot”. Ai iu drejtua emigrantëve me këtë mesazh: “Mos ejani më këtu! Qëndroni në qendrat e emigrantëve në Serbi, Maqedoni dhe Greqi. Kroacia nuk është rruga për në Europë. Nuk mund të shkoni dot me autobus në veri, është një gënjeshtër”.
