Napoli vazhdon serinë e rinovimeve me lojtarët më të rëndësishëm dhe tani është radha e Elseid Hysajt. Mbrojtësi kuqezi dhe klubi, sipas agjentit të tij, kanë rënë dakord prej kohësh për rinovimin dhe tani mbetet vetëm akti formal i nënshkrimit të kontratës së re.
La Gazzetta dello Sport bën të ditur se në kontratën e re të mbrojtësit do të vendoset një “shifër përbindësh” si klauzolë lirimi. Kush dëshiron të marrë Hysajn në të ardhmen, pa konsensusin e klubit, si në rastin e Gonzalo Higuain, duhet të paguajë plot 50 milionë euro.
Me kontratën e re, Hysaj bëhet shqiptari me klauzolën më të lartë të lirimit. Donis Avdijaj ka pasur një klauzolë lirimi 45 milionë euro me Schalke 04 në Gjermani, që nga koha kur cilësohej si një talentet më të mëdhenj të futbollit gjerman, por pa avancuar më tej në zhvillimin e tij. Për sa i përket Hysajt, bëhet fjalë për një mbrojtës tashmë të afirmuar, pavarësisht moshës ende të re, titullar i padiskutueshëm te Napoli dhe i kërkuar nga disa klube të mëdhenj në Evropë, deri te Bayern e Atletico Madrid.
d.i.
