Pacientët e Elbasanit të prekur nga sëmundjet tumorale e marrin tashmë shërbimin e kimioterapisë në spitalin rajonal të këtij Qarku. Investimi i realizuar në këtë spital për ofrimin e shërbimit të njohur si “Day Hospital”, për të gjithë ata qytetarë, të cilët kryejnë seancat e kimioterapisë, garanton edhe përgatitjen e mjekimit me barna pranë Kapave (aparaturave të specializuara), dhe jo më në mënyrë manuale siç kryej disa vite më parë.
Lajmi konfirmohet nga Ministria e Shë ndetësisë sipas së cilës në këtë mënyrë, pacientët e qarkut të Elbasanit nuk do të duhet më të udhëtojnë drejt Tiranës, duke shmangur në këtë mënyrë edhe radhën e pritjes, por mund të marrin një pjesë të shërbimeve pranë spitalit Rajonal të Elbasanit.
Ministri Ilir Beqaj, i shoqëruar edhe nga deputeti Taulant Balla, vizituan mjediset e rikonstruktuara ku ofrohet shërbimi i kimioterapisë.
Beqaj u shpreh se këtë vit po bëhet e mundur që të sëmurët me sëmundje të rënda tumorale, një pjesë të shërbimit ta marrin në spitalet Rajonale dhe të mos jenë detyruar më që ti drejtohen vetëm spitalit në Tiranë në Qendrën Universitare.
“Në spitalin Rajonal të Elbasanit ne bëmë përgatitjet e infrastrukturës së nevojshme që prej një viti, dhe këtë vit kemi 100 milionë lekë në buxhet të programuar për të siguruar barnat Citostatikë për të filluar mjekimin e mjaft pacientëve apo pacienteve nga Elbasani dhe i gjithë qarku i Elbasanit “, tha Beqaj. /b.d
