Në ditën e parë të regjistrimit të nxënesve në vitin e ri shkollor, ministri i Mirëqenies Sociale dhe Rinisë, Blendi Klosi, ka zgjedhur një nga shkollat më me zë profesionale në Elbasan, “Ali Myftiu”, për të parë më nga afër nisjen e ciklit të regjistrimeve. Edhe pse është dita e parë e regjistrimeve, duket se nxënësit që sapo kanë përfunduar ciklin 9 – vjecar i janë drejtuar shkollave profesionale për të nxjekur ciklin e mesëm shkollor.
Në këtë kuadër, ministri Klosi i shoqëruar nga kreu i Bashkisë, Qazim Sejdini dhe prefekti, Arben Kamami, pasi ka parë nga afër ambjentet e kësaj shkolle si dhe laboratorin e praktikës, e ka cilësuar si një sukses rritjen e kërkesave, duke pohuar se “e gjithë puna që kemi bërë një vit më parë me të gjithë drejtuesit e shkollave të arsimit profesional, me shumë partnerë të arsimit profesional, komunitetet e biznesit, ku falë këtij sensibilizimi shohim se vetëm në ditën e parë të regjistrimit janë 200 nxënës të regjistruar krahasur me një vit më parë, ku në total kanë qenë 300 nxënës”.
Klosi tha se “ne do të arrijmë objektivin tonë të dyfishimit të nxënësve që ndjekin arsimin profesional, jo vetëm në qytetin e Elbasanit, por në të gjithë Shqipërinë, pasi ka një rritje të kërkesave jo vetëm nga nxënësit, por edhe nga prindërit për të ndjekur arsimin profesional, pasi po shihet në të gjithë Shqipërinë si një nga mundësitë më të mira për të ndryshuar nivelin ekonomik të jetës”.
Duke vlerësuar stafin pedagogjik të shkollës, si dhe bashkinë e Elbasanit, Klosi theksoi se “Ne po bejme investime te mëdha jo vetëm për shkollën “Ali Myftiu”, por edhe në të gjithë Shqipërinë, ku përveç buxhetit të shtetit, qe do të financojë një projekt prej 600 mijë euro për rehabilitimin e kësaj shkolle të bazës së tij prodhuese, janë edhe projektet e KE që do të transformojë qendrën e Formimit Profesional pranë shkollës “Ali Myftiu”, në një nga qëndrat më të mira në rajon. Oferta që i kemi bërë qytetarëve shqiptarë për më shumë arsim profesional dhe brezit të ri për më shumë edukim profesinal dhe zanat, është një ofertë e cila ka bazën tek një jetë më të mirë”.
Klosi tha se “për herë të parë pas kaq vitesh, për arsimin profesional është edhe kriteri i notës, me qëllim që të jetë shkolla e nxënësve me sa më shumë mundësi dhe në këtë kuadër falenderoj bashkinë e Elbasanit që ka ndihmuar për realizimin e këtij proçesi. Edhe me buxhetin e vitit të ri që po përgatisim do të shtojmë buxhetin për arsimin dhe edukimin profesional”, tha Klosi.
Kreu i Bashkisë, Qazim Sejdini, pasi ka ofruar edhe akomodim falas në konvikte për nxënësit me probleme ekonomike, ka falenderuar ministrin Klosi që zgjodhi Elbasanin në ditën e parë të regjistrimeve, duke deklaruar ndër të tjera se “tashmë Elbasani është bërë qyteti pilot në bashkimin e dy shkollave të mesme profesionale. “ Sali Ceka”, “ Ali Myftiu” si edhe Qendrës së Formimit Profesional dhe në këtë kuadër është detyra jonë që t’i gjendemi pranë nxënësve, me qëllim krijimin e kushteve të punësimit dhe praktikës. Ne kemi rritur bashkëpunimin me Dhomën e Tregtisë dhe Industrisë, si dhe me bizneset, me qëllim që këta nxënës të praktikohen dhe pas përfundimit të shkollës të kenë mundësi të punësohen dhe deri më tani ja kemi arritur që të kemi rezultate të larta përsa i përket punësimit të tyre. Shpresoj se Elbasani do të jetë ne pararojë në arsimin profesional në Shqipëri”, theksoi Sejdini.
