Kryetari i Partisë Social Demokrate, Skënder Gjinushi gjatë takimeve elektorale që po zhvillon, ka hapur dje fushatqën në qytetin e Elbasanit. Në takimin e organizuar Gjinushi u shfaq së bashku me kryetarin aktual të Bashkisë së Elbasanit, Qazim Sejdini.
Por edhe pse ripërsëriti qëndrimin e PSD-së për të qenë e vetme në zgjedhje, kërkoi votat e simpatizantëve të partisë që ai drejton për kandidatin e mazhorancës Qazim Sejdini.
Ai bëri të qartë se PSD vazhdon të jetë një e majtë besnike dhe në ato bashki ku nuk ka kandidatët e saj mbështet kandidatët e së majtës.
“Partia Social Demokrate, siç dihet hyn në këto zgjedhje si forcë e pavarur, e pavarur nga grupimet politike, por duke mbetur një forcë e së majtës dhe përfaqësuesja më besnike e së majtës shqiptare. Pra ne do të vazhdojmë të përfaqësojmë me dinjitet votuesit e majtë me bindje me traditë dhe me vizion. Kemi vendosyur disa nga kandidatët tanë atje ku synojmë fitoren, por në të tërë bashkitë ku nuk kemi kandidat ne mbështesim kandidatët e së majtës, veçanërisht atje ku e meritojnë me punën e tyre dhe me vlerat e tyre si dhe me besimin e fituar tek zgjedhësit, si këtu në Elbasan. Vota për Partinë Social Demokrate në këshill dhe për Qazim Sejdinin si kandidat është votë e dyfishtë për të majtën në Elbasan”, tha Gjinushi në fjalën e tij.
