Policia e Elbasanit nuk ka sqaruar faktin se pse viktima kishte dy mbiemra në zotërim, raporton “Panorama”. Në njoftimin e vdekjes, së dhënë nga familja, viktima është me emrin Erion Mihallari, ndërkohë që nga ana e Policisë deklarohet se viktima është Erion Millo.
“Më datë 01.10. 2016, në afërsi të stacionit të trenit, është vrarë me armë zjarri shtetasi Erion Millo, 37 vjeç, banues në Elbasan.
Grupi hetimor, pas marrjes së njoftimit, mbërriti menjëherë në vendngjarje për kryerjen e veprimeve hetimore dhe proçeduriale”, bëri të ditur Policia.
Në momentin pas krimit, Policia e pati identifikuar viktimën me mbiemrin Mihallari, ndërsa dje në njoftimin zyrtar përdori atë me të cilin njihet në dokumente, Millo.
Viktima Erion Millo (Mihallari), ndonëse nuk njihej në qytet për aktivitetin e tij, në dokumentet e Qendrës Kombëtare të Regjistrimit të Biznesit rezulton se prej vitit 2013 ka nën administrimin e tij një kompleks në Xibrakë.
Sipas të dhënave zyrtare, ky aktivitet është regjistruar në vitin 2013, me emrin “Garden-Erion M 2014” dhe Erion Millo rezulton pronari i vetëm.
Si objekt të aktivitetit është shënuar: tregtim me pakicë të karburanteve, vajra lubrifikantë, të gazit, bar, restorant dhe hotel.
