Detaje të reja zbardhen nga ekzekutimi i 42-vjeçarit Shkëlzen Kastrati, brenda makinës së tij, paraditen e djeshme në Urën e Sheqit në fshatin Sheq në Fier.
Gazetari Sokol Dema raporton se pas ekzaminimit të trupit të Shkëlzen Kastratit, rezultoi se goditjet kanë qenë në pjesën e krahut, ndërsa një plumb e ka goditur në kokë. Pas ngjarjes, janë shoqëruar në Policinë e Fierit dhe janë marrë në pyetje dëshmitarët okularë, të cilët kanë treguar çfarë kanë parë.
Ndërkohë janë sekuestruar edhe pamjet e kamerave të sigurisë së bizneseve në këtë zonë, të cilat do mund të ndihmojnë në zbardhjen e ngjarjes. Edhe pse ende nuk ka një pistë të saktë, mendohet që hasmëria dhe konfliktet e vjetra mund të kenë çuar në ekzekutimin e 42 vjecarit, vetëm pak metra larg biznesit të tij dhe në një rrugë që e frekuentonte pothuajse përditë.
Kastrati do të përcillet sot në orën në 13.00 për në banesën e fundit. Ai ka qenë në lëvizje me makinë, kur është qëlluar nga një person nga një tjetër makinë tip ‘Range Rover’. Kastrati ka ecur disa metra duke u përplasur me një makinë tjetër që po kalonte aty. 42 vjeçari është vëllai i Kelmend Kastratit, të cilit i është bërë atentat më 8 janar të 2016-ës dhe dyshohej për gjobëvënie. Edhe vetë Shkëlzen Kastrati ka qenë me precedentë penalë, ndaj edhe dyshohet se vrasja është bërë për hakmarrje.
Nga hetimet e deritanishme nuk ka akoma të dyshuar. Autori i vrasjes është larguar nga vendngjarja me një automjet tip “Range Rover”, i cili u gjet nga shërbimet i djegur te vendi i quajtur “Mbikalimi i Baltzës”./a.p
