Pas ngjarjes tragjike që tronditi sistemin gjyqësor dhe opinionin publik, Këshilli i Lartë Gjyqësor ka reaguar me një deklaratë, duke shprehur dhimbje, indinjatë dhe njëkohësisht duke hedhur dritë mbi paralajmërimet dhe kërkesat që i janë bërë prej kohësh institucioneve përkatëse për garantimin e sigurisë në gjykata.
Në një njoftim zyrtar për shtyp, KLGJ e cilëson vrasjen e gjyqtarit Astrit Kalaja brenda sallës së gjyqit si një “sulm ndaj vetë themeleve të drejtësisë, ndaj autoritetit të gjykatës dhe ndaj rendit kushtetues të Republikës së Shqipërisë”.
KLGJ ka bërë publike të gjitha shkresat dhe korrespondencat zyrtare me Policinë e Shtetit dhe Ministrinë e Brendshme, duke theksuar se kërkesat për më shumë efektivë policie në gjykata janë refuzuar për mungesë personeli.
Në shkresën nr. 5489/1 Prot., datë 02.11.2023, Këshilli i është drejtuar zyrtarisht Policisë së Shtetit dhe Ministrisë së Brendshme, duke kërkuar shtimin e pranisë policore në sallat e gjyqit gjatë seancave. Por, përgjigjja që kanë marrë më 11 dhjetor 2023 ka qenë se për momentin, nga policia, nuk ka personel.
“Aktualisht e kemi të pamundur shtimin dhe planifikimin e punonjësve të policisë për sigurimin e ambienteve të brendshme të gjykatave dhe gjatë zhvillimit të seancave gjyqësore, për shkak të limitit të kufizuar të personelit policor”
KLGJ thekson se prej kohësh ka ngritur alarmin për mungesën e sigurisë brenda ambienteve gjyqësore.
“Mungesa e prezencës efektive të policisë në sallat e gjyqit krijon risk serioz për sigurinë e gjyqtarëve, stafit dhe publikut”, – thuhet në deklaratë.
Përmes një mbledhjeje të jashtëzakonshme të zhvilluar menjëherë pas ngjarjes, Këshilli analizoi masat aktuale të sigurisë dhe theksoi nevojën për reagim institucional të menjëhershëm.
Në shkresën tjetër, nr. 5489/3 Prot., datë 15.12.2023, drejtuar Ministrisë së Brendshme, KLGJ i ka kërkuar me urgjencë ndërhyrje për shtimin e organikës së Policisë së Shtetit dhe planifikimin e efektivëve për seancat gjyqësore publike. Kjo kërkesë, sipas KLGJ-së, u bë “duke marrë shkas nga ngjarjet e fundit të kërcënimeve ndaj gjyqtarëve”.
KLGJ i bën apel organeve ligjzbatuese dhe ekzekutive për marrje të menjëhershme të përgjegjësisë institucionale.
“Ngjarje të tilla nuk mund të trajtohen si raste të izoluara. Ato kërkojnë reagim të fortë, sistematik dhe të koordinuar, në mënyrë që të mos përsëritet më kurrë një humbje jete në sallën e gjyqit”.
Në përfundim të deklaratës, KLGJ shprehet se drejtësia nuk mund të gjunjëzohet nga dhuna.
