Ka mbërritur këtë fundjavë, në New Jersey, SHBA, Indrit Shehi, i ekstraduar nga Shqipëria. 35-vjeçari ishte në krye të listës së Më të Kërkuarve (Most Wanted) të Zyrës së Sherifit të Kontesë së Bergenit në Neë Jersey, ku jetojnë shumë shqiptarë.
Shehi ka jetuar në arrati për gati një dekadë. Në vitin 2006, ai duhej të paraqitej në Gjykatën e Lartë të Kontesë Bergen, sepse akuzohej për një vjedhje me armë, në afërsi të Lodit. Mbi të rëndonin edhe akuza të tjera, ndër të cilat edhe armëmbajtje në mënyrë të paligjshme.
Kapja e tij me ndihmën e Marshallit përkatës në bashkëpunim me zyrën për Punët Ndërkombëtare në Departamentin e Drejtësisë, është një shenjë se po ikën koha kur dikush mund të bënte një krim në Amerikë dhe të fshihej diku tjetër.
Arratia e shqiptarit përfundoi muajin e kaluar, kur një gjykatë në Shqipëri, mori në shqyrtim kërkesën amerikane për ekstradim, për Indrit Shehin të kapur nga autoritetet shqiptare. Ekstradimi u aprovua dhe ai tani ndodhet në burgun e kontesë ku është akuzuar se ka kryer krimin. Data e daljes në gjyq nuk është dhënë ende, por lista e akuzave tani do të shtohet me ato që kanë të bëjnë me shmangien dhe sabotimin e drejtësisë.
