Ka shkuar në tetë numri i shqiptarëve të ekstraduar nga Emiratet e Bashkuara Arabe, deri pak kohë më parë një vend i sigurt për persona me precedent kriminal që kanë zgjedhur Dubain si strehë.
Mesnatën e të enjtes, tre të kërkuar të drejtësisë shqiptare, Ervis Daka, Maksim Koçi dhe Ado Xhika u ekstraduan drejt Tiranës.
Forca të shumta të RENEA-s dhe rethuan Rinasin për shkak rrezikshmërisë së personazheve që njihen si ushtarë të bandës së të shumëkërkuarit Talo Çela.
Ata akuzohen për një sërë veprash të rënda kriminale, që nga prodhimi i armëve e deri te vrasja me paramendim.
Ervis Daka, 38 vjeç, akuzohet për tentativë vrasjeje, sigurim i kushteve për vrasje në dy atentate të rënda në dëm të Kei Pikut dhe Arjan Spahiut në vitin 2020. Në rastin e Pikut ishte informator për lëvizjet, ndërsa te Spahiu në Belgjikë siguroi kushtet për eliminim. Daka akuzohet se strehoi Talo Çelën në kërkim.
Maksim Koçi dyshohet për vrasjen e dy personave si dhe siguroi kushtet për vrasjen e 2 të tjerëve, përfshirë ndihmën për fshehjen e Talo Çelës.
Ado Xhika, 40 vjeç, është nën akuzë për përkrahje të autorit të krimit si pjesë e grupit kriminal për eliminim e Ardian Çapjas, gjatë sulmit me snajper, të cilit mundi t’i mbijetojë. Xhika, për 2 vjet me radhë ka ndihmuar Talo Çelën të fshihet, thonë autoritetet.
