Vetëm në tetor, eksportet ranë 9.3%. Krahas “mineraleve, lëndëve djegëse e energjisë”, fillon dhe tkurrja e grupit të tretë më të madh “materiale ndërtimi dhe metale”. Rriten ndjeshëm eksportet e “ushqime, pije e duhan”…
Eksportet arritën në 205.8 miliardë lekë për 10-mujorin e këtij viti, duke shënuar rënie me 4.3% në raport me të njëjtën periudhë të një viti më parë, sipas statistikave të publikuara sot nga INSTAT. Ritmet e rënies janë përshpejtuar, në raport me 9 mujorin, ku tkurrja ishte 3.7%.
Rënia e thellë e grupit “minerale, lëndë djegëse, energji” po “gropos” eksportet totale, ndërsa për herë të parë gjatë këtij viti edhe grupi i tretë më i madh “material ndërtimi dhe metale” ka shënuar ecuri negative.
Grupet e tjera janë në përmirësim, të ndjeshëm, sidomos “pijet, ushqimet e duhani” dhe “makineri e pajisje”, por pesha e tyre e vogël, në raport me totalin, bën që ato të mos kenë ndikimin në trendin e përgjithshëm të eksporteve.
Eksportet e “minerale, lëndë djegëse, energji” ranë me 23%, në 57 miliardë lekë me bazë vjetore për periudhën janar-tetor. Koniunktura e pafavorshme ndërkombëtare, sidomos për naftën, është arsyeja kryesore e rënies, teksa operatorët nuk kanë interes të prodhojnë e eksportojnë, kur çmimet kanë prekur fundin. Edhe importet e energjisë janë në rënie, për shkak të rritjes së prodhimit vendas dhe thatwsirws sw tetorit. Beralb, prodhuesi i kromit pezulloi aktivitetin në shtator.
Eksportet e tekstile e këpucëve u rritën me 3.1% në gati 75 miliardë lekë për 10-mujorin, duke qenë grupi më i madh i eksportuar në vend me 36% të totalit (një vit më parë kryesonin lëndët djegëse e energjia me 34% të totalit). Ndonëse ky grup e ka marrë veten, pas rënies në muajt e parë të vitit, sërish ai mbetet larg rritjeve dyshifrore që u panë vitin e kaluar. Aktorët e tregut pohojnë se rritja e ndjeshme e kostove të aktivitetit po e bën këtë industri më pak konkurruese, ndërkohë që kërkesat nga partnerët e huaj nuk po mungojnë.
Materialet e ndërtimit dhe metalet shënuan rënie për herë të parë për 10 mujorin, si rrjedhojë e tkurrjes së fortë në tetor, me 16% në tetor, duke rezultuar me eksporte prej 30.8 miliardë lekësh, për periudhën janar-tetor. Kompania Kurum ka kaluar një periudhë të vështirë në periudhën shtator-tetor, duke ndikuar në performancën negative të këtij grupi.
Eksportet e ushqimeve, pijeve e duhanit kanë shënuar rritjen më të madhe në vlerë absolute për 10-mujorin, duke u zgjeruar me gati 3.3 miliardë lekë, apo 25%, për të arritur në 16.5 miliardë lekë.
Eksportet e makinerive dhe pajisjeve kanë ngadalësuar rritjen në raport me pjesën e parë të vitit, megjithatë janë rritur me ritme dyshifrore, me 27% në 9.3 miliardë lekë.
Eksportet e drurit dhe letrës, një grup që u rrit me ritme dy shifrore vitin e kaluar ka rezultuar me rënie këtë vit, duke u ulur me 9.6% për 10 mujorin, në 6.8 miliardë lekë. Kompania “Center Shqiptare”, me qendër në Berat, që vitin e kaluar shënoi një lulëzim të eksporteve të çantave të letrës dhe kartonëve në vendet e BE-së, rezulton të ketë frenuar aktivtetin këtë vit.
Për 10-mujorin, grupi më i eksportuar ishin tekstilet e këpucët, me 36% të totalit, ndërsa “Mineralet, lëndët djegëse e energjia” kanë zbritur në vendin e dytë me 28% të totalit, nga 34% që zinin për të njëjtën periudhë të një viti më parë.
Në tetor, eksportet ranë 9.3%
Në muajin Tetor 2015 eksportet e mallrave arritën vlerën 20 mld lekë, duke u ulur me 9,3 % në krahasim me Tetor 2014 dhe 1,0 % në krahasim me Shtator 2015. Importet e mallrave në muajin Tetor 2015 arritën vlerën 50 mld lekë, duke u ulur me 4,3 % në krahasim me Tetor 2014 dhe duke u rritur me 14,0 % në krahasim me Shtator 2015. Deficiti tregtar i këtij muaji është 30 mld lekë, duke u ulur me 0,6 % krahasuar me Tetor 2014 dhe duke u rritur me 27,0 % në krahasim me Shtator 2015.
Ulja vjetore e eksporteve prej 9,3 % këtë muaj është ndikuar kryesisht nga grupet: “Minerale, lëndë djegëse, energji elektrike” me -8,7 pikë përqindje, “Materiale ndërtimi dhe metale” me -2,4 pikë përqindje, “Prodhime druri dhe letre” me -0,9 pikë përqindje. Në ndryshimin vjetor të eksporteve kanë ndikuar pozitivisht grupet: “Tekstile dhe këpucë” me +2,3 pikë përqindje, “Ushqime, pije, duhan” kanë kontribuar me +1,0 pikë përqindje, “Produkte kimike dhe plastike” me +0,4 pikë përqindje.
MONITOR
