Eksplozivi i vendosur në banesën e shtetasit Roland Tema dje në Greps të Niklës dyshohet se ka lidhje me bandën e drogës së Fushë-Krujës, e cila u shkatërrua disa ditë më parë, shkruan Panorama.
Ngjarja ka ndodhur rreth orës 01:50, në fshatin Greps, Nikel, Krujë, ku si pasojë e shpërthimit ka pasur vetëm dëme materiale, duke u thyer një xham i mjetit tip fuoristradë “ML”, me targa AA 510 CB, në pronësi të Temës, i parkuar në afërsi të banesës.
Shpërthimi ka krijuar panik ndër banorë. Burime nga grupi hetimor thanë për Panoramën se lënda plasëse ishe hedhur disa metra larg banesës së 36- vjeçarit, i cili njihet nga policia si person me precedentë të mëparshëm penalë, por pranë automjetit të tij. Qëllimi dyshohet të jetë presion, për të trembur Roland Temën dhe të hapte panik te familjarët e tij.
Roland Tema ka deklaruar për Policinë se nuk ka asnjë ide kush mund të ketë qenë personi që e ka hedhur lëndën plasëse, duke theksuar se nuk ka pasur konflikte me persona të tjerë përgjatë këtyre viteve të fundit.
Personi të cilit iu vendos eksploziv është i afërm me anëtarët e bandës së Fushë-Krujës që u shkatërrua pak ditë më parë nga policia. Efektivat e Policisë po punojnë për identifikimin dhe kapjen e autorëve, si edhe zbardhjen e plotë të ngjarjes. Policia e Krujës ka shoqëruar disa persona për të mësuar më shumë rreth ndonjë konflikti të mundshëm të Roland Temës, mes tyre edhe persona që mund të kenë dijeni mbi ngjarjen.
Të premten e shkuar, Policia e Durrësit zhvilloi një aksion në këtë zonë, duke kapur 6 persona me 20 kg kanabis. Në operacionin e koduar “Greps” u bë arrestimi i Ylli Temës, 33 vjeç; Artur Temës, 27 vjeç, Gëzim Temës, 37 vjeç, banues në Greps, Fushë-Krujë, si dhe Indrit Kapllanit, 31 vjeç, Gani Ramës, 47 vjeç dhe Edmond Matjas, 37 vjeç, banues në Fushë-Krujë.
Sipas grupit hetimor, arrestimi i tyre u bë pasi në fshatin Greps, në Fushë-Krujë, gjatë kontrollit të ushtruar në banesën e shtetasit Gëzim Tema, të pranishëm ishin edhe shtetasit e tjerë të arrestuar, që u kapën në flagrancë duke paketuar një sasi lënde narkotike, me qëllim për ta shitur në qytetin e Fushë-Krujës.
Në cilësinë e provave materiale u gjetën dhe u sekuestruan rreth 20 kg lëndë narkotike e dyshuar si kanabis sativa, një mjet luksoz tip “BMW” me targa AA 303 KZ, mjeti tip “Audi” me targa AA 949 LE dhe 12 aparate telefoni celularë.
Panorama
