Ekspertiza mjekoligjore ka vërtetuar se 60- vjeçari Agim Arapi ka ndërruar jetë për shkak të problemeve që ka pasur me zemrën. Ai nuk i ka përballuar dot goditjet me grushte nga pronarët e picerisë, duke pësuar një atak kardiak. Policia e Durrësit ka rindërtuar skenën e krimit ku humbi jetën Arapi. Për këtë ngjarje akuzohen dy vëllezërit Kostandin dhe Kujtim Ekonomi, përkatësisht 54 dhe 50 vjeç, banues në Durrës.
Ndërsa faktet e mbledhura sipas policisë vërtetojnë se dhëndri i Kostandinit, Jurgen Kurti, nuk ka marrë pjesë në përplasjen fizike. Palët rezulton se janë konfliktuar me njëritjetrin me sende të forta për motive të dobëta (për një tub aspirimi).
Autorët e arrestuar, Kostandin dhe Kujtim Ekonomi, si dhe shtetasi Jurgen Kurti, i detyroheshin viktimës që t’i paguanin një shumë parash, 13 mijë lekë të rinj, për tubin e aspirimit që kalonte nga dyqani i viktimës.
Viktima ia ka kërkuar shtetasit Jurgen Kurti paratë dhe në debat e sipër, kanë ardhur dhe janë përfshirë në konflikt edhe dy vëllezërit Ekonomi, të cilët menaxhojnë picerinë. Këta dy të fundit e kanë futur Agim Arapin brenda në dyqanin ushqimor dhe kanë mbyllur qepenin, ku aty më pas e kanë goditur me grushte. Gjatë kësaj kohe, shtetasi Jurgen Kurti rezulton se ka qenë jashtë dyqanit ushqimor (qepeni ishte i mbyllur dhe brenda ndodheshin viktima e dy vëllezërit Ekonomi).
Pasi e kanë goditur disa herë me shkelma e grushte në pjesë të ndryshme të trupit, si dhe në kokë, ata janë larguar duke tentuar të lëvizin nga vendi i ngjarjes me një automjet, por u kapën nga forcat e Policisë, të cilat mbërritën në kohë në vendin e ngjarjes. Ndërkohë, i dëmtuari është transportuar drejt spitalit, por fatkeqësisht ka ndërruar jetë.
Nga ekspertiza mjekoligjore u vërtetua se shtetasi Agim Arapi ka ndërruar jetë për shkak të problemeve që ka pasur me zemrën, ku nuk ka përballuar dot goditjet me grushte, të kryera nga autorët.
“Viktima nuk kishte plagë të thella në trup apo dëmtime që të ishin vdekjeprurëse. Ne mendojmë se viktima ka ndërruar jetë për shkak të problemeve që ka pasur me zemrën. Pak muaj më parë, ai kishte kryer ndërhyrje kirurgjikale në zemër, ndaj nuk ka përballuar dot goditjet me grushte, të kryera nga autorët”, thanë ekspertët mjekoligjorë.
Ngjarja ndodhi mbrëmjen e së martës, rreth orës 19:55, në lagjen Nr.1, Durrës, në bulevardin “Epidam”, në një dyqan ushqimor në pronësi të shtetasit Agim Arapi. Burime të Policisë bënë të ditur se 24- vjeçari Jurgen Kurti nuk ka marrë pjesë në ngjarjen e ndodhur.
Provat e mbledhura e përjashtuan atë nga autorësia e krimit dhe mbrëmë ai është liruar. Vetë i riu gjatë marrjes në pyetje ka mohuar të ketë dhunuar 60-vjeçarin Arapi, i cili gjeti vdekjen dy net më parë në Durrës.
ma.me
