Gjykata Themelore e Pejës, dega në Deçan, i ka dhënë fund të martën shqyrtimit gjyqësor në lëndën e ngritur kundër Afrim Cacajt nga Deçani, pasi prokurori i lëndës, Ardian Hajdaraj, ka hequr dorë nga ndjekja penale dhe aktakuza e ngritur kundër të akuzuarit, për veprën penale pushtim të paligjshëm të pronës nga neni 332 të KPK-së, shkruan “Koha Ditore”.
Kjo lëndë është iniciuar në mars të vitit të kaluar me padinë e ngritur nga Manastiri i Deçanit, me pretendimet se i padituri ka uzurpuar gjysmë ari tokë të Manastirit, në të cilën ai vjet kishte ndërtuar një kamp-shtëpizë nga druri.
Por gjatë procesit është konstatuar se prona për të cilën ka pretenduar Manastiri se është e vetja ka dalë se figuron në kadastër në emër të dikujt tjetër.
Gjatë një viti janë mbajtur disa seanca gjyqësore, që janë drejtuar nga gjyqtari i rastit, Sulltan Dobraj. Seanca e parafundit, para një muaji, qe mbajtur në vendin ku dyshohet se është bërë pushtimi i pronës.
