Në një intervistë për emisionin “Mirëmëngjes Shqipëri” në RTSH1, eksperti i ekonomisë, Edvin Stefani, ka sqaruar rreth masave të reja për faljen e detyrimeve tatimore, duke theksuar se këto falje nuk përfshijnë gjobat për automjetet.
Ai shpjegoi se ligji i ri prek individë dhe biznese që kanë borxhe për detyrime tatimore, përfshirë TVSh dhe taksat doganore, duke lehtësuar ata që kanë papaguar nga viti 2015 deri në dhjetor 2024. Ai theksoi se ligji nuk përfshin faljen e gjobave të tjera, si ato për automjetet.
“Bëhet fjalë për individ të cilët falen për detyrim tatimi për të ardhurat, për biznese në forma të ndryshme si person fizik ose entitet të cilët falen për detyrimet e tatimeve për të ardhurat për TVSh dhe taksa doganore dhe nuk bëhet fjalë për faljet e gjobave të makinës. Nëse unë si biznes kam marrë një gjobë në mars apo në prill të 2025 ky ligj nuk ki përfshinë këto gjëra. Përfshin njoftim vlerësimet të dala deri në dhjetor 2024. Për njoftim vlerësimet të dala deri në dhjetor 2014 falet çdo gjobë. Ndërkohë për detyrimet nga 2015-2019 është lënë një afat për tu falur nëse entiteti paguan burimin tatimor”, u shpreh Stefani.
Ai u shpreh gjithashtu se nuk duhet të ketë shqetësim se ky mekanizëm mund të nxisë bizneset të anashkalojnë detyrimet e tyre sepse ka penalitete që ato do të përballen.
Sipas eksperti, administrata tatimore ka mekanizma të forta për të mbledhur borxhet, si bllokimi i llogarive bankare dhe pasurive, por ky ligj i ri ofron mundësi për ata që janë në vështirësi financiare dhe duan të shfrytëzojnë mundësinë për të pastruar borxhet e vjetra.
“Duhet të kemi parasysh se si rezultat i punës së administratës, ajo merret me vjeljen e borxhit sepse ka një sërë instrumentesh. Administrata bllokon llogaritë bankare të biznesit, shkon deri tek llogaritë bankare personale të administratorit, bllokon të drejtën për shitjen e mjeteve, të bllokon shit-blerjen e pronave. Duhet të kuptojmë se bizneset të cilat janë operative i kanë paguar detyrimet, zakonisht kjo pjesë që i referohet ligji dhen që prek janë ato persona të cilët e kanë mbyllur biznesin dhe i kanë bllokuar shit-blerjen e një automjeti dhe në këtë rast ky person i cili tashmë e ka mbyllur biznesin përfiton nga kjo falje. Një biznesmen nuk thotë s’ka problem le të marrë gjobën se në të ardhmen do të falen, bizneset janë të tilla që kufizohen nga frika ndaj penaliteteve. Kjo është pjesë e një pakete të tërë, janë bërë disa ndryshime dhe është pjesë e “paqes fiskale”, dhe unë do ta quaja si diçka jo shumë të zakonshme”, tha ai.
