Eksperti i Ekonomisë Arjan Kadareja e konsideron largimin e Britanisë nga BE lajm të keq për të gjitha palët. Dalja nga zona euro e një tregu financiar kaq të rëndësishëm, do sjellë për pasojë shtimin e barrierave, por edhe rrjedhjen e fondeve të investimeve jashtë Bashkimit Evropian. Për pasojë do kemi një përkeqësim të klimës së investimeve dhe pakësimin e fondeve për vende si Shqipëria.
Dalja e Britanisë nga Bashkimi Evropian, është lajm i keq për vetë britanikët, për BE-në, por edhe për ekonomitë e vogla si Shqipëria, që shpresojnë të bëhen pjesë e këtij unioni. Eksperti i ekonomisë Arjan Kadareja thotë se shkëputja e një shteti kaq të rëndësishëm nga pikëpamja financiare, do bëjë që sasi të konsiderueshme fondesh të qarkullojnë jashtë kufijve të BE-së. Bashkë me pengesat në qarkullimin e fondeve, kjo situatë do përkthehet në më pak investime në vendet e Bashkimit Evrpopian dhe përreth tij.
Kadare thotë se dalja e Britanisë, nuk do luajë rol negativ në përspektivën e Shqipërisë dhe vendeve të tjera për t’u përfshirë në BE. Ndërkohë që vetë Bashkimi Evropian duhet ta shohë votën jo si një nxitje për të rishikuar përqasjen me ekonomitë përreth tij, dhe veçanërisht për rishikimin e barrierave burokratike që vështirësojnë këto raporte./Report tv/a.k
