Eksperti i sigurisë Fatjon Softa, ka komentuar bilancin e ngjarjeve kriminale që kanë ndodhur përgjatë vitit që po lëmë pas 2024.
Ai u shpreh se dy nga ngjarjet që ai veçon si krimet më të rënda të këtij viti janë atentati i Vlorës dhe masakra e Dobraçit, ndërsa theksoi se shumë ngjarje janë të pazbuluara, ku një mister vijon të mbetet zhfdukja e Ervis Martinajt.
Sipas tij zbërthimi i Sky ECC dhe Enchro i kanë dhënë një ndihmë të madhe autoriteteve për zbardhjen e disa ngjarjeve, po ashtu dhe të penduarit e drejtësisë, edhe pse herë pas herë tentohet të hidhet baltë ndaj policisë.
“Është fundi i vitit dhe bëhet një bilanc dhe sigurisht pasqyrojmë disa nga ngjarjet që kanë tronditur publikun. Ngjarjet më të rënda sipas meje ka qenë atentati i Vlorës dhe masakra e Dobraçit.
Viti është i mbushur me shumë ngjarje të tilla nga vrasje në familje, vetëvrasje e deri te atentatet dhe ngjarje të pazbuluara. Një bilanc bëhet dhe për punën e mirë të bërë nga policia.
Ngjarje ka shumë të pazbardhura por një pjesë vjen duke u zbardhur dhe për shkak të kryqëzimit të informacioneve dhe ajo që ka hedhur disi dritë që ka ndihmuar strukturën e posaçme është zbërthimi i Skay Ecc dhe Enchrochat dhe të penduarit e drejtësisë. Zhdukja e Ervis Martinaj është ajo që ka mbajtur peng opinionin duke mos u zbuluar”, tha Softa në “MCN”.
Sa i përket atentateve, Softa tha se janë ngjarje që vijnë si rrjedhojë e shumë faktorëve, së pari larje hesapesh, konflikte, prishje interesash apo hakmarrje që vijnë sipas aktiviteteve të paligjshme.
“Këto ngjarje që një pjesë dhe janë zbuluar nga policia kanë ardhur dhe si rrjedhojë e forcës zbuluese, por ato që mbeten shqetësuese është ajo si ngjarja e Dobraçit që mbetet një ngjarje e rëndë por ende e pazbuluar. Ndonjëherë strukturat me dëshirën e mirë për të zbuluar ngjarjen bëjnë deklarata që bien ndesh me realitetin duke krijuar mosbesim te publiku se shumë ngjarje mafioze nuk janë ende të zbuluara.
Ngjarjet kur ndodhin brenda zonave të banuara sigurisht që do ketë dhe viktima të pafajshme dhe atentatet kryesisht kanë ndodhur në ambiente publike si ngjarja në Don Bosko ku ekzekutohet kamerierja, që ndodhej aty për shkak të punës.
Unë do e quaja vitin e SPAK këtë 2024 sepse të gjitha këto hetime dhe akuza të ngritura i takojnë 2024, ndërsa zbardhjet e reja i presim në 2025 përmes aplikacionit Matrix. Po ashtu është dhe goditja e 7 grupeve kriminale. Fakti që bëheshin bashkë biznesmenë, gjyqtarë dhe punonjës policie tregon se sa të fuqishëm ishin këta grupe duke veçuar këtu atë të Elbasanit”, tha ai.
