Dy ekspertë u urdhëruan nga Gjykata Administrative për të përcaktuar dëmin moral dhe material që i është shkaktuar familjes Myrtaj nga vrasja e kryefamiljarit të saj, Faik Myrtaj, më 21 janar 2011.
Dy ekspertë janë caktuar nga Gjykata Administrative, me qëllim përcaktimin e dëmit që i është shkaktuar familjes së një prej viktimave të protestës së 21 janarit.
Gjithashtu, këta ekspertë do të përcaktojnë nëse vetëvrasja e djalit të Faikut ka ardhur si pasojë e vdekjes së të atit.
Për sa i përket dëmshpërblimit, përfaqësues të Gardës së Republikës kanë pretenduar se dëmshpërblimi do t’i kërkohet autorit të vrasjes, ish-komandantit, Ndrea Prendi, dhe institucionit që e kishte punësuar, Ministrisë së Brendshme.
Por sipas avokatit të familjes Myrtaj kjo kërkesë nuk qëndron. Bëhet e ditur se ky vendim është marrë sot, pas padisë që kjo familje ka bërë ndaj Gardës së Republikës dhe Ministrisë së Brendshme.
Mësohet se gjykata i la afat dy javor ekspertëve për të përpiluar raportin nga i cili do të përcaktohet edhe vlera e dëmshpërblimit.
Ndërkohë, në protestën e opozitës në 21 janar humbën jetën katër protestues.
Dita/d.i.