EKSKLUZIVE/Orët e fundit drejt mandatit, Ndocaj rrëfen nga Italia kontaktet me Ramën
Eduart Ndocaj është i sigurt që mandati i deputetit i takon atij pas doreheqjes së Arben Ndokës, ndaj dhe ai ka bërë gati axhendën për qytetarët lezhjanë. Në një intervistë telefonike për Java News, pasi Ndocaj ndodhet në Itali, tregon se ai do të jetë zeri i fuqishëm i lezhjanëve në Parlament.
“Sipas radhës e sipas Kodit Zgjedhor më takon mua të jem deputeti i ri e përfaqësuesi e lezhjanëve deri në fund të kësaj legjislature. Unë po pres në ditët në vazhdim të më bëj kërkesë Komisioni i Imuniteteve për të bërë betimin”, deklaroi Ndocaj për Java News.
I pyetur për komunikimin e tij me kryeministrin Edi Rama si dhe elementë të tjerë të PS-së, ai tregon se nuk ka pasur komunikim që pas fushatës zgjedhore të 2013. Megjithatë thotë se për hatër të punës si deputet dhe të qytetarëve lezhjanë do të bashkëpunojë me kryeministrin Rama nëse duhet.
Sa i përket zhvillimeve të fundit në politikën shqiptare, Eduart Ndocaj thekson: “Në gjykimin tim, zhvillimet e fundit në politikën shqiptare kanë qënë tronditëse, megjithatë për të dy deputetët duhet të presim vendimin e autoriteteve përkatëse”. Ndocaj tha për Java News se “do të jem zëri i njerëzve të thjeshtë. Zëri i qytetarëve të ndershëm. Zëri i personave në nevojë”.
Redaksia Java News/ f.g
