Ministria e Punëve të Jashtme bën gati projektligjin për të nxjerrë nga qarkullimi pasaportat e shërbimit. Problematika, si dhe kategoritë që kanë përfituar
Lamtumirë pasaporta e shërbimi. Ministria e jashtme pritet shume shpejt te paraqesë një projektligj në Kuvend me anë të të cilit parashikon që të heqë nga qarkullimi pasaportën e shërbimit. Zyrtarë të lartë të ministrisë së jashtme shqiptare bën të ditur për “JAVANEWS” se juristët e këtij institucioni po përgatisin aktet ligjore për të nxjerrë nga qarkullimi dokumentin në fjalë. Sipas tyre, në kushtet kur Shqipëria ka përfituar nga liberalizimi i vizave me vendet e Bashkimit Europian, vijimi i mëtejshëm i praktikës së dhënies së pasaportave të shërbimit është tërësisht i panevojshëm.
Por nga ana tjetër mësohet qeveria nëpërmjet kësaj mase synon që t’i japë fund një praktike e cila më së shumti ka qenë objekt debatesh, si për kriteret e dhënies së pasaportës së shërbimit ashtu edhe për përfitimet e rrjedhura prej saj. Në shumicën e rasteve dhënia e pasaportës së shërbimit është konsideruar më së shumti një veprim klientelist.
Përfituesit
Në bazë të ligjit të hartuar që në shtator të vitit 1997 nga qeveria e ish kryeministrit Fatos Nano, rrethi i personave që përfitonin parasaporta shërbimi ishte shumë i madhë, duke filluar nga zv/ministrat, zv/prokurorët, anëtarët e KLD-së, drejtorët e departamenteve pranë Këshillit të Ministrave, drejtuesit e televizioneve, kryeredakorët, gazetarët, prefektë, kryebashkiakë e kryetarë këshillash rrethi, kryetarët e partive politike që nuk përfaqësohen në Parlament e Qeveri, krerët e komuniteteve fetare, biznesmenë etj.
Problematika
Dhënia e pasaportave të shërbimit përveç debateve lidhur me klientelizimit në dhënien e tyre ka pasur si problematikë edhe faktin se shumë persona që i disponojnë ndonëse kanë lënë funksionet prej të cilave i kanë përfituar këto pasaporta nuk kanë zbatuar detyrimin ligjor për t’i dorëzuar pranë drejtorisë së personelit në ministrinë e jashtme. Kjo ka bërë që në qarkullim të jenë mijëra pasaporta shërbimi, shumica prejt të cilave mbahet deri dhe në kundërshtim me dispozitat ligjore dhe kriteret për dhënien e këtyre pasaportave. Nga ana tjetër dhënia e këtyre pasaportave në jo pak raste në media apo në biznese është përdorur ndër vite nga ana e shtetarëve dhe për t’i pasur “nën sqetull”.
Reagimi
Por ky hap që pritet të hedhë ministria e jashtme për të nxjerrë nga qarkullimi pasaportat e shërbimit, pritet të hasë në jo pak rezistencë nga përfituesit e këtyre pasaportave, kryesisht në rradhët e drejtuesve të mediave, gazetarëve, si dhe një mori biznesmenësh. Për shumë vite pasaportat e shërbimit kanë qenë një “biznes” i leverdisshëm edhe për shumë dhoma tregëtie anë e mbanë vendit, “biznes” të cilin nuk janë të gatshëm që të braktisin lehtë.
