JAVANEWS / Ka bërë bujë një lajm javën që lamë pas, teksa gazetat sportive e më pas thuajse të gjithë portalet folën për një shqiptar që i gatoi trahana Kristiano Ronaldos në Greqi. Historia e treguar nga gazeta përfundonte edhe me një dhuratë që kuzhinieri shqiptar i kishte bërë asit të futbollit botëror. Në shkrim thuhej se jo vetëm që Ronaldo ishte surprizuar nga trahanaja, por Alsi i kishte dhënë me vete Ronaldot çaj mali. Një histori kjo që ngjan me rastin e shqiptarit Hajdar K. Shtimja, i cili kish pasur një korrespondencë me Mark Zuckerber dhe më pas doli se e gjitha ishte një ‘kurth’ për mediat.
Në fakt, takmi mes Alsit dhe Ronaldos është i vërtetë, por me një ndryshim rrënjësor: Shqiptari nuk ka gatuar kurrë trahana për Ronaldon, e aq më pak t’i ketë dhënë me vete çaj mali.
JavaNews ka arritur të kontaktojë me Alsi Sinanajn, i cili jo vetëm që ka mohuar kategorikisht lajmin e dhënë, por ka shprehur habinë sesi një media mund të arrij të vejë në gojën e tij një sërë fjalësh që ai as i ka menduar, e jo më ti ketë thënë.
Alsi si qëndron e vërteta e takimit tënd me Kristiano Ronaldon?
Unë jetoj në Greqi prej 25 vitesh. Me Kristiano Ronaldon u takova para dy vitesh në Mikono ku më morën në telefon për të gatuar për atë person. Nuk e dija në fillim për kë do gatuaja. Po i them këto sepse në media qarkulloi një lajm pa dijeninë time, pa e ditur dhe pa thënë unë asnjë fjalë tek asnjeri. Ende nuk e di ku i morën fotografitë e mia dhe si i nxorrën ato fjlë. E vetmja gjë që më bëri të qeshja është kur thanë se i kisha gatuar trahana dhe i dhashë çaj. Nuk mund të gatuhet trahana dhe çaj në qershor me 40 gradë temperatura…
Por në fakt ju i keni shërbyer Ronaldo?
E vetmja e vërtetë është se gatova për futbollistin për katër ditë me radhë. Është një njeri i thjeshtë, flet me respekt dhe gjatë kërkesës së tij për të ngrënë ishte po ashtu i thjeshtë. Nuk kishte pretendime. Në mëngjes pinte lëngje frutash, hante shumë fruta. Bënte gjimnastikë dhe plazh në pishinë. Në drekë ushqim të preferuar kishte mishin e pjekur. Unë i gatova sipas kërkesës së tij kuzhinë të amerikës latine, të Perusë. Kuzhinë japoneze, greke dhe pak italiane. Kjo është e vërteta dhe këto ishin preferencat e tij.
