Mbyllja e Ngushticës së Hormuzit ka penguar furnizimet globale me plehra kimike.
Me dërgesat që janë ndalur në masë të madhe që nga fillimi i luftës, analistët parashikojnë se rritja e çmimeve dhe mungesat mund të çojnë në ulje të prodhimit bujqësor deri në 30 për qind, duke ndikuar drejtpërdrejt në koston e produkteve ushqimore.
Duke folur për Al Jazeera, Maximo Torero, ekonomisti kryesor i Organizatës së OKB-së për Ushqimin dhe Bujqësinë (FAO), tha se situata po përkeqësohet “sepse po garojmë me kalendarët e të mbjellave”, duke theksuar se sezoni i mbjelljeve në “disa vende të Azisë” tashmë ka kaluar.
Ndërkohë, eksportues të mëdhenj si SHBA dhe Brazili mund të kalojnë në kultura që “fiksojnë më shumë azot”, duke u zhvendosur nga gruri dhe misri drejt sojës, shtoi ai.
Në kushtet e rritjes së çmimeve të naftës, disa fermerë mund të orientohen edhe drejt prodhimit të biokarburanteve.
Torero theksoi se çmimet e grurit dhe sojës tashmë kanë filluar të rriten.
“Kjo do të zhvillohet gjatë gjysmës së dytë të vitit dhe presim që çmimet e mallrave bazë të rriten ndjeshëm vitin e ardhshëm”, tha ai, duke shtuar se pritet “rritje e çmimeve të mallrave dhe inflacion më i lartë ushqimor, sepse ushqimi që konsumojmë nuk përfshin vetëm produktin bazë, por edhe koston e energjisë.”
“Siç kemi thënë vazhdimisht, kjo është një krizë që po ndërtohet gradualisht. Me kalimin e kohës dhe ditëve, situata vetëm sa përkeqësohet”, përfundoi ai.
